Jelide ýkraınalyq bloger men Reseıdegi qazaq qyzy arasyndaǵy chat-rýletkadaǵy kezekti vıdeosy jarıalandy, dep habarlaıdy Dalanews.kz.

Bloger Andreı Popık Samara qalasyndaǵy etnıkalyq qazaq qyzymen bolǵan áńgimesin jarıa etti. Beınejazbada ol 20 mınýt boıy qazaq halqynyń ejelgi memleketi men jazýy bolǵanyn túsindirýge tyrysady: Qazaq handyǵy burynnan bar, qalalary men damyǵan mádenıeti bolǵan deıdi. Alaıda suhbattasýshy áıel – mektep muǵalimi bolsa da – óz pikirinen qaıtpaıdy.

– Qazaqtardyń óz memleketi bolmaǵan, biz – kóshpeli halyqpyz. Jazý da bolmaǵan, basqa týraly aıtpasa da bolady! Eger Qazaq handyǵy rasynda bolǵan bolsa, onda sol kezde orystar qaıda júrgen? Orystar jaýlap alýshy boldy deısiz be? Ondaı bolsa da, báribir – orystar myqty halyq, osy ýaqyt ishinde úlken el, qýatty memleket qura aldy. Men Reseıde turamyn, osynda týyldym – bul meniń Otanym. Bul tildiń baılyǵy men jazýyn endi ǵana bilip, shok bolyp otyrmyn, – dedi áıel.