7 naýryzda Resei federaldyq qaýipsizdik qyzmeti (FSB) Kalýga oblysynda "terrorist" degen kúdikpen atyp óltirgen Qazaqstan azamattary Sábit Áshiráliev pen Jánibek Tasqulovtyń súiegi týystaryna áli berilmedi, dep habarlaidy Dalanews.kz.
Bul týraly Azattyqqa marqumdardyń týystary aitty.
"Esh habar joq. Kútýden basqa amal qalmady" deidi Áshirálievtiń aǵasy.
Jánibek Tasqulovtyń qaryndasy Áigerim Tasqulova "aǵamnyń aiyby bolsa dáleldesin, ólgen bolsa denesin bersin" deidi.
Qazaqstannyń syrtqy ister ministrligi Áshiráliev pen Tasqulovtyń súiegin Reseiden aldyrýmen Ulttyq qaýipsizdik komiteti ainalysyp jatqanyn jetkizdi.
Azattyq Ulttyq qaýipsizdik komitetine Áshiráliev pen Tasqulov jóninde saýal joldaǵan, biraq ázirge jaýap kelmedi.
7 naýryzda Reseidiń aqparat quraldary osy eldiń federaldyq qaýipsizdik qyzmeti (FSB) "Máskeýdegi sinagogalardyń birine qarýly shabýyl jasaýdy josparlaǵan "Islam memleketi" terror uiymynyń (Qazaqstanda tyiym salynǵan uiym – red.) Aýǵanstandaǵy "Horasan ýálaiaty" atty bólimshesiniń músheleri óltirilgeni" jóninde habar taratty. Aqparatta FSB Kalýga oblysyndaǵy Koriakovo eldi mekeninde "ustamaq bolǵan kezde qarýly qarsylyq tanytqandardyń kózin joiǵany" jáne "olar turǵan úiden Makarov tapanshasy, Kalashnikov avtomaty, oq-dári men qoldan jarylǵysh zat daiyndaýǵa arnalǵan zattar tabylǵany" aitylǵan.
Keiinirek reseilik ASTRA telegram-arnasy FSB Kalýga oblysynda Qazaqstannyń eki azamaty – Sábit Áshiráliev pen Jánibek Tasqulovty óltirgen degen aqparat jariialady. Onda Qazaqstan azamattary Resei aýmaǵyna 28 aqpan kúni barǵan dep kórsetilgen. Sol kúni Qazaqstannyń Ulttyq qaýipsizdik komiteti Reseide eki qazaqstandyq qaza tapqanyn rastady.
"Buqaralyq aqparat quraldarynda Reseide terakt uiymdastyrmaq bolǵan Qazaqstannyń eki azamatyn Reseidiń kúshtik qurylymdary kózin joiǵany jóninde aqparat jariialandy. Bul adamdarda Qazaqstan azamattyǵy bolǵandyǵy jáne Reseige barǵandyǵy rastalady. Kórsetilgen fakti boiynsha UQK sotqa deiingi tergep-tekserý júrgizip jatyr. Tekseris yntymaqtastyq arnasy aiasynda Resei federaldyq qaýipsizdik qyzmetimen tyǵyz bailanysta júzege asyrylyp jatyr" dep habarlaǵan UQK. Komitet tergeý qupiialyǵyn alǵa tartyp, basqa málimet bermedi.
Arada bir apta ótkende reseilik telegram-arnalar Kalýga oblysy Koriakovo eldi mekeninde óltirilgen
qazaqstandyq Sábit Áshiráliev pen Jánibek Tasqulov Reseidegi terrorister men ekstremister tizimine engizilgeni týraly aqparat taratty.
Áshiráliev pen Tasqulov - Túrkistan oblysy Saryaǵash aýdanynyń turǵyndary. Marqumdardyń týystary olardy "terrorist" degenge senbeidi. Olar marqumdardyń súiegin Reseiden aldyrýǵa kómektesýin surap prezident Qasym-Jomart Toqaevqa júgingen edi.
Eske salaiyq, Eske salaiyq, 22 naýryz kúni Máskeýdegi "Krokýs Siti Holl" kontsert zalynda terakt boldy. Qarýlanǵan birneshe adam kontsert zalyna basyp kirip, ishinde júrgen adamdarǵa oq jaýdyra bastaǵan. Sol kúni ǵimaratta 6200-ge jýyq adam bolǵan.
