7 ناۋرىزدا رەسەي فەدەرالدىق قاۋىپسىزدىك قىزمەتى (فسب) كالۋگا وبلىسىندا "تەرروريست" دەگەن كۇدىكپەن اتىپ ولتىرگەن قازاقستان ازاماتتارى ءسابيت اشىرالييەۆ پەن جانىبەك تاسقۇلوۆتىڭ سۇيەگى تۋىستارىنا ءالى بەرىلمەدى، دەپ حابارلايدى Dalanews.kz.
بۇل تۋرالى ازاتتىققا مارقۇمداردىڭ تۋىستارى ايتتى.
"ەش حابار جوق. كۇتۋدەن باسقا امال قالمادى" دەيدى اشىرالييەۆتىڭ اعاسى.
جانىبەك تاسقۇلوۆتىڭ قارىنداسى ايگەرىم تاسقۇلوۆا "اعامنىڭ ايىبى بولسا دالەلدەسىن، ولگەن بولسا دەنەسىن بەرسىن" دەيدى.
قازاقستاننىڭ سىرتقى ىستەر مينيسترلىگى اشىرالييەۆ پەن تاسقۇلوۆتىڭ سۇيەگىن رەسەيدەن الدىرۋمەن ۇلتتىق قاۋىپسىزدىك كوميتەتى اينالىسىپ جاتقانىن جەتكىزدى.
ازاتتىق ۇلتتىق قاۋىپسىزدىك كوميتەتىنە اشىرالييەۆ پەن تاسقۇلوۆ جونىندە ساۋال جولداعان، ءبىراق ازىرگە جاۋاپ كەلمەدى.
7 ناۋرىزدا رەسەيدىڭ اقپارات قۇرالدارى وسى ەلدىڭ فەدەرالدىق قاۋىپسىزدىك قىزمەتى (فسب) "ماسكەۋدەگى سيناگوگالاردىڭ بىرىنە قارۋلى شابۋىل جاساۋدى جوسپارلاعان "يسلام مەملەكەتى" تەررور ۇيىمىنىڭ (قازاقستاندا تىيىم سالىنعان ۇيىم – رەد.) اۋعانستانداعى "حوراسان ءۋالاياتى" اتتى بولىمشەسىنىڭ مۇشەلەرى ولتىرىلگەنى" جونىندە حابار تاراتتى. اقپاراتتا فسب كالۋگا وبلىسىنداعى كورياكوۆو ەلدى مەكەنىندە "ۇستاماق بولعان كەزدە قارۋلى قارسىلىق تانىتقانداردىڭ كوزىن جويعانى" جانە "ولار تۇرعان ۇيدەن ماكاروۆ تاپانشاسى، كالاشنيكوۆ اۆتوماتى، ءوق-دارى مەن قولدان جارىلعىش زات دايىنداۋعا ارنالعان زاتتار تابىلعانى" ايتىلعان.
كەيىنىرەك رەسەيلىك ASTRA تەلەگرام-ارناسى فسب كالۋگا وبلىسىندا قازاقستاننىڭ ەكى ازاماتى – ءسابيت اشىرالييەۆ پەن جانىبەك تاسقۇلوۆتى ولتىرگەن دەگەن اقپارات جاريالادى. وندا قازاقستان ازاماتتارى رەسەي اۋماعىنا 28 اقپان كۇنى بارعان دەپ كورسەتىلگەن. سول كۇنى قازاقستاننىڭ ۇلتتىق قاۋىپسىزدىك كوميتەتى رەسەيدە ەكى قازاقستاندىق قازا تاپقانىن راستادى.
"بۇقارالىق اقپارات قۇرالدارىندا رەسەيدە تەراكت ۇيىمداستىرماق بولعان قازاقستاننىڭ ەكى ازاماتىن رەسەيدىڭ كۇشتىك قۇرىلىمدارى كوزىن جويعانى جونىندە اقپارات جاريالاندى. بۇل ادامداردا قازاقستان ازاماتتىعى بولعاندىعى جانە رەسەيگە بارعاندىعى راستالادى. كورسەتىلگەن فاكتى بويىنشا ۇقك سوتقا دەيىنگى تەرگەپ-تەكسەرۋ جۇرگىزىپ جاتىر. تەكسەرىس ىنتىماقتاستىق ارناسى اياسىندا رەسەي فەدەرالدىق قاۋىپسىزدىك قىزمەتىمەن تىعىز بايلانىستا جۇزەگە اسىرىلىپ جاتىر" دەپ حابارلاعان ۇقك. كوميتەت تەرگەۋ قۇپيالىعىن العا تارتىپ، باسقا مالىمەت بەرمەدى.
ارادا ءبىر اپتا وتكەندە رەسەيلىك تەلەگرام-ارنالار كالۋگا وبلىسى كورياكوۆو ەلدى مەكەنىندە ولتىرىلگەن
قازاقستاندىق ءسابيت اشىرالييەۆ پەن جانىبەك تاسقۇلوۆ رەسەيدەگى تەرروريستەر مەن ەكسترەميستەر تىزىمىنە ەنگىزىلگەنى تۋرالى اقپارات تاراتتى.
اشىرالييەۆ پەن تاسقۇلوۆ - تۇركىستان وبلىسى سارىاعاش اۋدانىنىڭ تۇرعىندارى. مارقۇمداردىڭ تۋىستارى ولاردى "تەرروريست" دەگەنگە سەنبەيدى. ولار مارقۇمداردىڭ سۇيەگىن رەسەيدەن الدىرۋعا كومەكتەسۋىن سۇراپ پرەزيدەنت قاسىم-جومارت توقايەۆقا جۇگىنگەن ەدى.
ەسكە سالايىق، ەسكە سالايىق، 22 ناۋرىز كۇنى ماسكەۋدەگى "كروكۋس سيتي حولل" كونسەرت زالىندا تەراكت بولدى. قارۋلانعان بىرنەشە ادام كونسەرت زالىنا باسىپ كىرىپ، ىشىندە جۇرگەن ادامدارعا وق جاۋدىرا باستاعان. سول كۇنى عيماراتتا 6200-گە جۋىق ادام بولعان.
