Otandyq júk tasymaldaýshylar Reseide bolý merzimderi boiynsha shekteýlerge jappai tap bolýda. Bul týraly Májilis depýtaty Bolatbek Najmetdinuly málimdedi. Onyń aitýynsha, tipti baz bir tasymaldaýshylar osy sebepti tergeý izoliatorlaryna da toǵytylǵan. Depýtat erejege sáikes sheteldikter elde kúntizbelik jyl ishinde 90 táýlik boiy vizasyz bola alatynyn eske saldy. Alaida, bul norma halyqaralyq avtomobil tasymalynyń ereksheligin eskere bermeidi, dep habarlaidy Dalanews.kz.
"Bizdiń júrgizýshiler basqa eldiń aýmaǵynda jeke sebeptermen emes, eńbek mindetterin atqarý kezinde bolady. Alaida, jańa talaptar olardy is júzinde Resei zańnamasyn buzýshylar qataryna jatqyzyp qoiady. Resei men Belarýs territoriiasynda bolý ýaqyty biriktirilip eseptelip, iaǵni Belarýs arqyly tranzit Resei Federatsiiasynda bolý merizimi retinde eseptelip jatady. Eýropalyq Odaqpen shekaradaǵy, sondai-aq Resei – Qazaqstan shekarasyndaǵy rásimnen ótý úshin kezekke turǵan kóp kúnder Qazaqstan, Ózbekstan, Qyrǵyzstan jáne basqa da elderdiń júrgizýshileri úshin de jalpy limit - 90 kúnge qosylady", - dep jazady Najmetdinuly Facebook-tegi paraqshasynda.
Depýtat EAEO, sondai-aq SIM jáne IIM sheńberindegi integratsiia jáne ózara is-qimyl máselelerine jetekshilik etetin vitse-premer Serik Jumanǵarinniń atyna depýtattyq saýal joldady.
"Másele teoriialyq sipatta emes, adal qazaqstandyq tasymaldaýshylar is júzinde Resei men Belarýs territoriiasy arqyly ótetin marshrýttarǵa qoljetimdilikti joǵaltý qaýpi bar shekteýlerge ushyraýda. Eger alda da bul jaǵdai ózgermese, bizdi jyljymaly quramnyń tapshylyǵy, shyǵyndardyń ósimi jáne naryqtan qazaqstandyq kompaniialardy Belarýs jáne Resei tasymaldaýshylarynyń yǵystyrýy syndy máseleleri kútip tur ", - dep sanaidy Nájimetdinuly.
Óz kezeginde, ol atap ótkendei, Qazaqstan adal jáne áriptestik tásildi qoldanady: elde bolý merzimderi boiynsha shekteýler halyqaralyq jáne tranzittik júk tasymaly jáne jolaýshylar kólik quraldary júrgizýshilerine qatysty qoldanylmaidy. Depýtat Qazaqstan turaqty jáne qaýipsiz kólik qatynasy úshin jaǵdai jasai otyryp, sheteldik tasymaldaýshylardy osyndai talaptardan bosatatynyn atap ótti.
"Atalǵan máseleniń Eýraziialyq ekonomikalyq komissiia deńgeiinde qarastyrýǵa usynylýy jáne bizdiń elderimiz arasyndaǵy áriptestik dialog aiasynda onyń qaralýy qajet dep sanaimyn. Bizdiń tasymaldaýshylar ózara kelisilmegen sheshimderdiń kepiline ainalmaýy kerek", - dep sózin túiindeidi depýtat.
