"Kórshimizdiń keibir azamattary Qańtar oqiǵasynda Kreml Qazaqstandy "qutqaryp qaldy" dep málimdep, oqiǵany barynsha burmalaýda. Osy úshin de "Qazaqstan Máskeýge máńgi qaryzdar, Reseige táý etip, qyzmet kórsetýi kerek" degen syńaida sóilep júr. Bul múlde aqylǵa syimaityn, shyndyqqa janaspaityn áńgime", – dedi Toqaev "Resei 24" arnasynyń tilshisi Andrei Kondrashovqa bergen suhbatynda.
Qazaqstan prezidenti Ujymdyq qaýipsizdik uiymynyń kúshtik qurylymdary atys-shabysty toqtatýǵa aralaspaityny týraly ýaǵdalastyq bolǵanyn atap ótti.
"Rasymen de, UQShU kontingenti tarapynan birde-bir oq atylmady. Budan syrt, kelisimge sai olar bizdiń elde 10 kúnnen artyq aialdamady", - dep atap ótti prezident.
Sondai-aq Memleket basshysy Eýraziialyq odaq pen UQShU qatarynan shyǵýǵa qatysty sońǵy kezderi jiilep ketken alyp-qashpa áńgimeni joqqa shyǵardy.
"Odaqtas elder arasyndaǵy integratsiialyq birlestikterdiń bailanysy bekip keledi. Barlyǵy óz retimen júzege asýda. Qazaqstan osynaý uiymdardaǵy belsendi qyzmetin jalǵastyra túsedi. "Qazaqstan Eýraziialyq odaqtan nemese Ujymdyq qaýipsizdik shart uiymynan shyǵady" degen áńgimeler qaýeset qana, shyndyqqa múldem janaspaidy", – dedi Toqaev.
