"كورشىمىزدىڭ كەيبىر ازاماتتارى قاڭتار وقيعاسىندا كرەمل قازاقستاندى "قۇتقارىپ قالدى" دەپ مالىمدەپ، وقيعانى بارىنشا بۇرمالاۋدا. وسى ءۇشىن دە "قازاقستان ماسكەۋگە ماڭگى قارىزدار، رەسەيگە ءتاۋ ەتىپ، قىزمەت كورسەتۋى كەرەك" دەگەن سىڭايدا سويلەپ ءجۇر. بۇل مۇلدە اقىلعا سىيمايتىن، شىندىققا جاناسپايتىن اڭگىمە"، – دەدى توقايەۆ "رەسەي 24" ارناسىنىڭ ءتىلشىسى اندرەي كوندراشوۆقا بەرگەن سۇحباتىندا.
قازاقستان پرەزيدەنتى ۇجىمدىق قاۋىپسىزدىك ۇيىمىنىڭ كۇشتىك قۇرىلىمدارى اتىس-شابىستى توقتاتۋعا ارالاسپايتىنى تۋرالى ۋاعدالاستىق بولعانىن اتاپ ءوتتى.
"راسىمەن دە، ۇقشۇ كونتينگەنتى تاراپىنان بىردە-بىر وق اتىلمادى. بۇدان سىرت، كەلىسىمگە ساي ولار ءبىزدىڭ ەلدە 10 كۇننەن ارتىق ايالدامادى"، - دەپ اتاپ ءوتتى پرەزيدەنت.
سونداي-اق مەملەكەت باسشىسى ەۋرازيالىق وداق پەن ۇقشۇ قاتارىنان شىعۋعا قاتىستى سوڭعى كەزدەرى جيىلەپ كەتكەن الىپ-قاشپا اڭگىمەنى جوققا شىعاردى.
"وداقتاس ەلدەر اراسىنداعى ينتەگراسيالىق بىرلەستىكتەردىڭ بايلانىسى بەكىپ كەلەدى. بارلىعى ءوز رەتىمەن جۇزەگە اسۋدا. قازاقستان وسىناۋ ۇيىمدارداعى بەلسەندى قىزمەتىن جالعاستىرا تۇسەدى. "قازاقستان ەۋرازيالىق وداقتان نەمەسە ۇجىمدىق قاۋىپسىزدىك شارت ۇيىمىنان شىعادى" دەگەن اڭگىمەلەر قاۋەسەت قانا، شىندىققا مۇلدەم جاناسپايدى"، – دەدى توقايەۆ.
