Kókshetaý, Óskemen jáne Semeide jańa jylý elektr ortalyqtary salynady. Buǵan deiin Almasadam Sátqaliev qarjy tartýdaǵy eń yqtimal nusqa Resei úkimetinen sýbsidiiamen nesie alý degen edi. Qazir bul stsenariidiń júzege asýy qiyndai túskeni baiqalady. Másele nede? Dalanews.kz materialynda.
Resei qarjylyq qiyndyqqa tap bolyp otyr ma?
Búgin premer-ministrdiń orynbasary Roman Skliar reseilik tarap jabdyq boiynsha paiyzdyq mólsherlemeni sýbsidiialaýda qiyndyqtarǵa tap bolǵanyn rastady.
Alaida Roman Skliar kelissózder jalǵasyp jatqanyn, al aldyn ala daiyndyq jumystary toqtamaǵanyn aitty.
"Resei qarjy bóle almasa, basqa investor tabamyz. Ázirshe áleýetti qaryz berýshiler joq. Biraq bul másele jaqyn arada, maýsymnyń sońyna deiin sheshiledi dep oilaimyn", - dedi ol.
Sarapshy syny
Energy Monitor qoǵamdyq qorynyń direktory, sarapshy Nurlan Jumaǵulovtyń sózinshe, Resei úsh jańa kómir elektr stantsiiasyn qarjylandyrýǵa tiis bolatyn, eki jylǵa jýyq ýaqyt ótse de, áli "múlgigen" tynyshtyq.
"Osy jobalar úshin memleketaralyq kelisim jobasy daiyndalǵan edi, biraq bul jerde de qarjylandyrý máseleleri týyndady", - dedi ol.
Joba týraly ne belgili?
2023 jyly 9 qarashada Resei prezidenti Vladimir Pýtinniń Qazaqstanǵa saparynyń qorytyndysy boiynsha Kókshetaý, Semei jáne Óskemende JEO salý jobalary boiynsha yntymaqtastyq týraly memorandým jasalǵan edi.
Keiin depýtattar Qazaqstan men Resei úkimetteri arasynda Kókshetaý, Semei jáne Óskemen qalalarynda kómir jaǵatyn jylý elektr ortalyqtaryn salý jobalary jónindegi kelisimdi ratifikatsiialaý týraly zań jobasyn jumysqa qabyldady.
Kelisim sheńberinde Kókshetaý (boljaldy qýaty 248 MVt), Semei (360 MVt) jáne Óskemen (360 MVt) qalalarynda kómir óndirý negizinde JES salý josparlandy.
Buǵan deiin "Samuryq Energo" AQ direktorlar keńesiniń múshesi Qairat Maqsutov Resei Qazaqstanda jylý elektr ortalyqtaryn salý úshin qansha qarjy jumsalýy múmkin ekenin aitty.
"Bul memlekettik saraptamadan ótkennen keiin belgili bolady. Smeta bolmaǵan kezde indikativti dep atalatyn qun bar. Boljamdy soma - 330 milliard teńge, árbir JEO-ǵa 270 milliard teńge jumsalady", - dedi ol buǵan deiin Úkimettiń baspasóz ortalyǵynda.
