Resei óz áskerin órteidi...
Amerikalyq eki kongres múshesi,«Resei Ýkraina shyǵysynda urysta qaza tapqan áskeriniń máiitin jasyrý úshin kóshpeli krematori (máiit órteitin pesh) qoldandy» dep aiyptaidy.
Bul málimdemelerdi AQSh qarýly kúshteri komissiiasynyń múshesi Mac Thornberry jáne Seth Moulton aitty. Eki kongresmende taqyrypqa qatysty Bloomberg gazetine suhbat bergen. Kongresmender jaqynda Ýkrainadaǵy jaǵdaidy zerttep qaitqan bolatyn.
Mac Thornberry Reseidiń bul kóshpeli krematori kómegimen Ýkrainadaǵy urysta qaza bolǵan Resei áskerleriniń máiitin jasyrǵanyn aitady. Reseidiń krematori paidalanýdaǵy maqsaty, Ýkrainada áskeriniń bolǵanyn jalǵyz álemnen ǵana emes, orys halqynan da jasyrý úshin paidalanǵan.
Moýltonnyń aitýynsha, Resei úshin urys aimaǵynda áskerlerdiń máiitterin kómý, jasyrý týrasynda másele týyndaǵan. Resei áskeriniń máiitterin jasyrý úshin krematoride jaǵý «qorqynyshty ári uiat nárse» ekenin aitady.
AQSh kongres músheleriniń «kóshpeli krematori» málimdemesi resmi Kreml tarapynan teristeldi. Kremldiń hatshysy Dmitrii Peskov, «mundai málimdeme avtorlarynyń ǵana emes, jaryqqa shyǵarǵan BAQ-tyń da esterinen adaspaǵanyna kúmánim bar» dedi.
«Resei prezidenti Vladimir Pýtin qol qoiǵan "beibit ýaqyttaǵy arnaiy operatsiia kezinde qaza tapqandar" týraly málimetterin qupiialandyrylǵan qaýly, Ýkrainadaǵy jaǵdaiǵa qatysy joq», – dedi Peskov. Buǵan deiin qarýly kúshterdiń tek soǵys kezinde qaza tapqan áskeriler týraly málimetteri ǵana qupiia bolatyn.
2014 jyly 23 tamyzda Ýkraina aýmaǵynda Reseilik 10 áýe desant sarbazdary urys barysynda qolǵa túsken. Biraq, Kreml málimdemesinde olar shekaradan baiqamai ótip ketti delingen.
Shyǵys Ýkrainada úkimet áskeri men separatister arasynda qaqtyǵys bastalǵan 2014 jyldyń sáýirinen beri qaza tapqan adam sany 6 myńnan asyp ketti.
Kiev Máskeýdi Ýkrainanyń shyǵysyndaǵy reseishil separatisterdi qoldap otyr dep aiyptaidy. Biraq Máskeý ony joqqa shyǵaryp keledi.
Nazar Turyqbaiuly
