امەريكالىق ەكى كونگرەس مۇشەسى،«رەسەي ۋكراينا شىعىسىندا ۇرىستا قازا تاپقان اسكەرىنىڭ ءمايىتىن جاسىرۋ ءۇشىن كوشپەلى كرەماتوري (ءمايىت ورتەيتىن پەش) قولداندى» دەپ ايىپتايدى.
بۇل مالىمدەمەلەردى اقش قارۋلى كۇشتەرى كوميسسياسىنىڭ مۇشەسى Mac Thornberry جانە Seth Moulton ايتتى. ەكى كونگرەسمەندە تاقىرىپقا قاتىستى Bloomberg گازەتىنە سۇحبات بەرگەن. كونگرەسمەندەر جاقىندا ۋكرايناداعى جاعدايدى زەرتتەپ قايتقان بولاتىن.
Mac Thornberry رەسەيدىڭ بۇل كوشپەلى كرەماتوري كومەگىمەن ۋكرايناداعى ۇرىستا قازا بولعان رەسەي اسكەرلەرىنىڭ ءمايىتىن جاسىرعانىن ايتادى. رەسەيدىڭ كرەماتوري پايدالانۋداعى ماقساتى، ۋكراينادا اسكەرىنىڭ بولعانىن جالعىز الەمنەن عانا ەمەس، ورىس حالقىنان دا جاسىرۋ ءۇشىن پايدالانعان.
موۋلتوننىڭ ايتۋىنشا، رەسەي ءۇشىن ۇرىس ايماعىندا اسكەرلەردىڭ مايىتتەرىن كومۋ، جاسىرۋ تۋراسىندا ماسەلە تۋىنداعان. رەسەي اسكەرىنىڭ مايىتتەرىن جاسىرۋ ءۇشىن كرەماتوريدە جاعۋ «قورقىنىشتى ءارى ۇيات نارسە» ەكەنىن ايتادى.
اقش كونگرەس مۇشەلەرىنىڭ «كوشپەلى كرەماتوري» مالىمدەمەسى رەسمي كرەمل تاراپىنان تەرىستەلدى. كرەملدىڭ حاتشىسى دميتريي پەسكوۆ، «مۇنداي مالىمدەمە اۆتورلارىنىڭ عانا ەمەس، جارىققا شىعارعان باق-تىڭ دا ەستەرىنەن اداسپاعانىنا كۇمانىم بار» دەدى.
«رەسەي پرەزيدەنتى ۆلاديمير پۋتين قول قويعان "بەيبىت ۋاقىتتاعى ارنايى وپەراسيا كەزىندە قازا تاپقاندار" تۋرالى مالىمەتتەرىن قۇپيالاندىرىلعان قاۋلى، ۋكرايناداعى جاعدايعا قاتىسى جوق»، – دەدى پەسكوۆ. بۇعان دەيىن قارۋلى كۇشتەردىڭ تەك سوعىس كەزىندە قازا تاپقان اسكەريلەر تۋرالى مالىمەتتەرى عانا قۇپيا بولاتىن.
2014 جىلى 23 تامىزدا ۋكراينا اۋماعىندا رەسەيلىك 10 اۋە دەسانت ساربازدارى ۇرىس بارىسىندا قولعا تۇسكەن. ءبىراق، كرەمل مالىمدەمەسىندە ولار شەكارادان بايقاماي ءوتىپ كەتتى دەلىنگەن.
شىعىس ۋكراينادا ۇكىمەت اسكەرى مەن سەپاراتيستەر اراسىندا قاقتىعىس باستالعان 2014 جىلدىڭ ساۋىرىنەن بەرى قازا تاپقان ادام سانى 6 مىڭنان اسىپ كەتتى.
كييەۆ ماسكەۋدى ۋكراينانىڭ شىعىسىنداعى رەسەيشىل سەپاراتيستەردى قولداپ وتىر دەپ ايىپتايدى. ءبىراق ماسكەۋ ونى جوققا شىعارىپ كەلەدى.
نازار تۇرىقباي ۇلى
