Qazaqstandaǵy Reseı elshiligi Qostanaıda ótken fýtbol machynda tóreshige ultarazdyq týdyratyn balaǵat sózder aıtqan reseılik bapkerge qatysty túsinik berdi, dep habarlaıdy Dalanews.kz.
"Jergilikti blogosferada jarıalanǵan Reseıdiń 2drots medıa komandasy jattyqtyrýshysynyń qazaqstandyq tóreshilerge qatysty balaǵat sózderine qatysty aıtar bolsaq, biz mundaı áreketke múldem jol bermeıtinimizdi habarlaımyz. Sonymen qatar qazaqstandyqtarǵa qatysty mundaı rıtorıkanyń belgili bir resýrstarynda aıtylǵan kózqaras shyndyqqa sáıkes kelmeıdi dep esepteımiz",- delingen elshiniń jaýabynda.
Ol Reseı Medıa lıga komandasy bas bapkeriniń eshqandaı resmı mártebesi joq ekenin de alǵa tartqan.
"Sondyqtan olardyń bul áreketin Reseı halqynyń ustanymynyń kórinisi dep sanaý durys emes", – dep atap ótedi kórshi memlekettiń resmı organy.
Aıta keteıik, buǵan deıin Qostanaıda ótken medıa komandalar arasyndaǵy fýtbol jarysynyń fınalynda reseılik 2drots komandasynyń bas bapkeri Dmıtrıı Kýznesov qazaqstandyq tóreshige: «Chýkcha» dep til tıgizip, balaǵattaǵan bolatyn.
