قازاقستانداعى رەسەي ەلشىلىگى قوستانايدا وتكەن فۋتبول ماچىندا تورەشىگە ۇلتارازدىق تۋدىراتىن بالاعات سوزدەر ايتقان رەسەيلىك باپكەرگە قاتىستى تۇسىنىك بەردى، دەپ حابارلايدى Dalanews.kz.
"جەرگىلىكتى بلوگوسفەرادا جاريالانعان رەسەيدىڭ 2drots مەديا كومانداسى جاتتىقتىرۋشىسىنىڭ قازاقستاندىق تورەشىلەرگە قاتىستى بالاعات سوزدەرىنە قاتىستى ايتار بولساق، ءبىز مۇنداي ارەكەتكە مۇلدەم جول بەرمەيتىنىمىزدى حابارلايمىز. سونىمەن قاتار قازاقستاندىقتارعا قاتىستى مۇنداي ريتوريكانىڭ بەلگىلى ءبىر رەسۋرستارىندا ايتىلعان كوزقاراس شىندىققا سايكەس كەلمەيدى دەپ ەسەپتەيمىز"،- دەلىنگەن ەلشىنىڭ جاۋابىندا.
ول رەسەي مەديا ليگا كومانداسى باس باپكەرىنىڭ ەشقانداي رەسمي مارتەبەسى جوق ەكەنىن دە العا تارتقان.
"سوندىقتان ولاردىڭ بۇل ارەكەتىن رەسەي حالقىنىڭ ۇستانىمىنىڭ كورىنىسى دەپ ساناۋ دۇرىس ەمەس"، – دەپ اتاپ وتەدى كورشى مەملەكەتتىڭ رەسمي ورگانى.
ايتا كەتەيىك، بۇعان دەيىن قوستانايدا وتكەن مەديا كوماندالار اراسىنداعى فۋتبول جارىسىنىڭ فينالىندا رەسەيلىك 2drots كومانداسىنىڭ باس باپكەرى دميتريي كۋزنەسوۆ قازاقستاندىق تورەشىگە: «چۋكچا» دەپ ءتىل تيگىزىپ، بالاعاتتاعان بولاتىن.
