Resei áskeri men qarýly tehnikasynyń 70 paiyzyn ýkraina shekarasyna jaqyn jerge jaiǵastyrdy. Osylai dep Reuters jáne Washington Postbasylymdary AQSh-tyń Barlaý qyzmetindegi derekkózine silteme jasap habarlady.
Málimetke qaraǵanda, Ýkraina shekarasyna jaqyn jerdegi reseilik batalondyq toptardyń sany 83-ke jetti. Budan bólek taǵy 14 top jolda bara jatqany habarlandy.
Derekkóz bir apta buryn shekara mańyndaǵy orys batalondarynyń sany 60-qa jaqyn bolǵanyn atap ótken. Basylymdardyń jazýynsha, bul sanǵa Belarýsta ótip jatqan áskeri jattyǵýǵa barǵan reseilik jaýyngerlerdiń qosylǵan-qosylmaǵany kórsetilgen emes.
Bir batalondyq topta 750-ge jaqyn ásker bar. Washington Post gazeti Ýkraina shekarasyna jaqyn jerdegi jáne anneksiialanǵan Qyrym túbegindegi reseilik áskerdiń jalpy sany 100-130 myń dep jazady.
Resei byltyr kúzden beri Ýkraina mańyna áskerin toptastyryp jatyr. Sońǵy aptada Belarýs aimaǵyna da orys áskerlerin jóneltip jatyr. Bul aimaq Ýkraina soltústigimen shekaralas.
Batys pen Kiev Resei jaqyn kúnderi Ýkrainaǵa shabýyl jasaýy múmkin dep eskertip keledi. Máskeý mundai nieti joq ekenin, áskeri jattyǵý ótkizý maqsatynda ǵana ekenin aityp, Batysqa "Ýkraina NATO-ǵa múshe bolmaýy kerek" degen talap qoiyp jatyr.
