Batys Qazaqstan oblysyndaǵy Reseimen shekarada júk kólikteriniń uzyn-sonar kezegi qaita paida boldy, dep habarlaidy dalanews.kz.
BQO boiynsha Memlekettik kirister departamenti Kazinform agenttigine bul aqparatty rastady. Vedomstvonyń málimetinshe, Qazaqstannan Reseige bet alǵan júk kólikteriniń sany keiingi kúnderi aitarlyqtai artqan.
Mamandardyń aitýynsha, kepteliske eń aldymen kókónis ónimderin eksporttaityn kólikterdiń maýsymdyq artýy áser etip otyr. Sonymen qatar, Resei tarapyndaǵy ótkizý beketiniń ótkizý múmkindigi shekteýli. Qoldanystaǵy talapqa sáikes, shekaradan saǵatyna nebári 25 júk kóligi, al táýligine 500-den aspaityn kólik ótkiziledi.
Oǵan qosa, qazirgi ýaqytta "Syrym" avtomobil ótkizý beketinde qaita jańǵyrtý jumystary júrgizilýde.
"Merdiger uiym Qazaqstanǵa kiretin baǵyttaǵy eki jolaqty ýaqytsha jabýdy josparlap otyr. Osyǵan bailanysty kólikter eki baǵytta da Qazaqstannan shyǵýǵa arnalǵan bir jolaq arqyly ótkiziledi. Sonyń nátijesinde ótkizý beketiniń jumys aýmaǵy 7 gektardan 1,5 gektarǵa deiin qysqarady", – dep habarlady Memlekettik kirister departamenti.
Vedomstvo jóndeý jumystarynyń da kólikterdiń shekaradan ótý ýaqytyn uzartyp, kezektiń artýyna yqpal etýi múmkin ekenin atap ótti.
