Resei men Qazaqstan arasyndaǵy "Syrym – Mashtakovo" shekara beketinde júzdegen júk kóligi eki táýlikten beri óte almai tur. Júrgizýshilerdiń aitýynsha, Resei aýmaǵyndaǵy keptelistiń uzyndyǵy shamamen 18 shaqyrymǵa jetken, dep habarlaidy dalanews.kz.
Halyqstan redaktsiiasyna joldanǵan videoda júk kóliginiń júrgizýshisi Aleksandr Resei tarapy kólikterdi ótkizýge daiyn ekenin aitqan. Alaida Qazaqstanǵa ótetin baǵytta kólikterdiń shamadan tys jinalyp qalýyna bailanysty qozǵalys baiaýlaǵan. Sonyń saldarynan júk kólikteri birneshe táýlik boiy ornynan jylji almai tur.
“Kezektiń basynda turǵan júrgizýshilerdiń aitýynsha, Qazaqstan jaǵy ne óte baiaý jumys istep jatyr, ne múlde qabyldamai otyr. Naqty sebebin bilmeimiz. Mamandar jetispei me, tehnika az ba – belgisiz. Biraq eki táýlikten beri bir metr de jyljyǵan joqpyz”, – deidi ol.
Uzaq kezekte turǵan júrgizýshilerge jol boiynda qajetti jaǵdaidyń bolmaýy qosymsha qiyndyq týǵyzyp otyr. Munda tamaqtaný oryndary qarastyrylmaǵan, aýyzsý tabý da qiyn. Sondai-aq dárethana men jýyný oryndary joq.
Buǵan qosa óńirde kún ystyq. Ashyq aspan astynda turǵan júrgizýshiler uzaq kútýge májbúr. Olardyń arasynda jemis-jidek pen kókónis sekildi tez buzylatyn ónimderdi tasymaldap kele jatqandar da bar. Uzaq kidiris saldarynan júktiń búliný qaýpi kúsheiip otyr.
Osyǵan bailanysty júrgizýshiler máseleni nazarǵa alyp, shekaradaǵy jaǵdaidy retteýdi surady.
