Vitse-premer Qanat Bozymbaev Aqtaý mańynda apatqa ushyraǵan AZAL ushaǵyna qatysty Resei tarapymen ótemaqy tóleý jóninde kelissóz júrgizilgeni týraly málimetten habarsyz ekenin aitty, dep habarlaidy dalanews.kz.
Onyń sózinshe, qaza tapqan jolaýshylardyń týystarynyń bir bóligi ótemaqy alyp úlgergen. Al qalǵandary boiynsha másele áli sot tártibimen qaralyp jatyr.
Bozymbaev ótemaqy tóleýge mindetti taraptar retinde ázirbaijandyq jáne reseilik saqtandyrý kompaniialary qarastyrylyp otyrǵanyn jetkizdi. Vitse-premerdiń aitýynsha, olar zardap shekkenderge kómek kórsetýge daiyn.
"Sheshim jaqyn arada qabyldanady dep oilaimyn. Menińshe, barlyq jolaýshy ótemaqyny tolyq kólemde alady. Azamattyǵyna qaramastan, zardap shekkenderdiń bárine tiisti tólem jasalýy kerek", – dedi ol.
Jýrnalister Resei Qazaqstanǵa ótemaqy tólei me dep suraǵanda, Qanat Bozymbaev mundai aqparatty estimegenin aitty. Sondai-aq ol Astana men Máskeý arasynda osy máselege qatysty qandai da bir kelisim bar-joǵynan habarsyz ekenin jetkizdi.
Vitse-premer Qazaqstannyń Ázirbaijan tarapymen bailanysta ekenin jáne jaǵdaidy baqylaýda ustap otyrǵanyn atap ótti. Onyń aitýynsha, ótemaqy tek Ázirbaijan azamattaryna ǵana emes, apattan zardap shekken ózge el azamattaryna da tólenýi tiis.
"Biz eshqandai kemsitýshilikke jol berilmeýi úshin qoldan kelgenniń bárin jasaimyz. Qazir keibir adamdardyń ótemaqy alyp úlgergeni kemsitýshilik joq ekenin kórsetetin siiaqty", – dedi Bozymbaev.
Sonymen qatar ol ótemaqynyń keshigýine kei jaǵdaida tólem alýshylardy zańdy túrde anyqtaý máseleleri sebep bolyp otyrǵanyn túsindirdi.
