Áleýmettik jelide ózin Pavlodar oblysynyń Ekibastuz qalasynyń turǵyny retinde tanystyrǵan áieldiń Resei prezidenti Vladimir Pýtinge úndeý joldaǵan beinejazbasy tarady. Videoda ol Resei áskerin Qazaqstanǵa kirgizýdi surap, qazaq halqyna qatysty kemsitýshilik sipattaǵy málimdemeler jasaǵan. Bul jaǵdaiǵa bailanysty zańger quzyrly organdardy tekserý júrgizýge shaqyrdy, dep habarlaidy dalanews.kz.
Beinejazbadaǵy áiel ózin Olga Borisovna Hmjanova dep tanystyrady. Ol Resei prezidentine tikelei úndeý jasap, Qazaqstanǵa ásker kirgizý týraly ótinish bildirgen.
"Ýkrainadaǵy jaǵdaiǵa bailanysty, Vladimir Vladimirovich, áskerdi Qazaqstanǵa da kirgizýińizdi ótinemin. Árbir qazaq óziniń iesi orys adam ekenin este saqtap, bilip júrýi úshin", – deidi ol beinejazbada.
Munymen shektelmegen áiel Qazaqstannyń egemendigine qatysty daýly pikir aityp, eldegi qazaqtardyń quqyǵyna qatysty kemsitýshilik sipattaǵy sózder qoldanǵan.
"Reseidiń orys qalalaryn Resei báribir qaitaryp alady. Men orys adamymyn jáne Qazaqstandaǵy qazaqtardyń daýys berý quqyǵy joq dep málimdeimin", – degen ol óz pikirin qoldaityndardy beinejazbaǵa belgi qoiýǵa shaqyrǵan.
Áleýmettik jelide taraǵan bul málimdemege zańger Meiirman Shekeev nazar aýdardy. Ol Instagram paraqshasynda jariialaǵan jazbasynda beinejazbadaǵy sózderge quqyqtyq baǵa berilýi kerek ekenin málimdedi.
"Menińshe, bul áleýmettik jelidegi jai ǵana pikir emes. Mundai málimdemelerge quzyrly organdar beinedegi azamattyń jeke basyn anyqtap, quqyqtyq baǵa berýi qajet dep sanaimyn", – dep jazdy zańger.
Ol Bas prokýratýra, Ishki ister ministrligi, Ulttyq qaýipsizdik komiteti jáne Pavlodar oblystyq politsiia departamentin atalǵan beinematerialǵa nazar aýdarýǵa shaqyrǵan.
Zańgerdiń pikirinshe, beinejazbada aitylǵan sózder Qazaqstan Respýblikasy Qylmystyq kodeksiniń 174-baby boiynsha ulttyq, etnostyq jáne ózge de alaýyzdyqty qozdyrý, sondai-aq 180-baby boiynsha separatistik áreket belgileriniń bar-joǵy turǵysynan tekserilýi tiis.
"Ol úshin filologiialyq-lingvistikalyq saraptama taǵaiyndalýy tiis. Men eshkimdi aldyn ala kináli dep otyrǵan joqpyn. Biraq zań buzýshylyq belgileri bolsa, oǵan kóz juma qaraýǵa bolmaidy", – dedi Meiirman Shekeev.
Zańger eldiń birligi men qoǵamdyq tynyshtyǵyna qaýip tóndirýi múmkin málimdemeler nazardan tys qalmaýy kerek ekenin atap ótti.
"Elimizdiń birligi men tynyshtyǵyna qaýip tóndiretin kez kelgen áreket zań aiasynda tekserilip, tiisti jazasy berilýi kerek dep esepteimin. Zań bárine ortaq", – dep túiindedi ol.
Ázirge beinejazbadaǵy áieldiń jeke basy men onyń aitqan sózderiniń mán-jaiy resmi túrde rastalǵan joq. Sondai-aq quqyq qorǵaý organdarynyń atalǵan jaǵdai boiynsha tekserý bastaǵany týraly málimet joq.
