Qaraly habardy áleýmettik jelidegi marqummen jaqyn aralasqan qaýym qalyń jurtshylyqqa jetkizdi.
"Qazaq dep eńirep, arpalysyp, ómiri kúrespen ótip o dúniege ozdy. Bolat Atabaev aǵamyz teatr rejisseri, dramatýrg, qoǵam qairatkeri, "Alǵa" saiasi uiymynyń múshesi, Jańaózen qyrǵyny úshin qylmystyq qýdalaýǵa ushyraǵan azamat máńgilik mekenine jol tartypty. Imanyńyz salamat bolsyn! Sońǵy jyldary Almaniiada turdy, bilgendei biyl elimizge qaityp edi", – dep jazdy qoǵam belsendisi Ǵabiden Jákei.
"Bolat aǵa ekeýimiz ottan da, sottan da, túrmeden de birge óttik. Jańaózende ádildik úshin kúrestik, sol úshin qýǵyndaldyq ta. “Stolypin” dep atalatyn sottalǵandardy tasityn vagonda birge júrdik. Aýzyna qant salyp, tátti sý berip janyn alyp qalǵan edik 2012 jyly…", – dep jazdy oppozitsioner Janbolat Mamai.
Budan buryn Atabaevtyń jansaqtaý bólimine túskeni habarlanǵan bolatyn. Marqumnyń qaryndasy rejisserdiń búirek aýrýymen jáne qant diabetimen aýyratynyn aitqan. Byltyrǵy rejisserdiń aiaǵynyń tizeden tómengi bóligine ampýtatsiia jasalǵan. Ol birneshe kún essiz kúide jatqan. Esin jiǵan soń bir mezet Facebook-ta da shaǵyn jazba qaldyrǵan edi.
Bolat Manashuly Atabaev 1952 jyldyń 14 mamyrynda Almaty oblysyndaǵy Tenten aýylynda ómirge keldi.
2012 jyly «Aqsarai» teatrynyń rejisseri, qoǵamdyq belsendi Bolat Atabaevqa Qazaqstan biligi «áleýmettik arazdyq týǵyzdy» degen aiyp taqsa, Germaniianyń mádeniet institýty ony mádeni qarym-qatynas salasyndaǵy erekshe eńbegi úshin «Gete medalimen» marapattady.
Rejisser Bolat Atabaevtyń azamattyq qoǵam mádenieti, bilik jóninde ár jyldardaǵy pikirleri jurtshylyq nazaryn aýdardy. Ol «biliktiń sózi men isi alshaqtap ketkenin» aitqan.
– Bilikti tyńdasań – sózderi jaqsy, istegen isine qarasań – qusqyń keledi. Muny kórip ósken jastar da ekijúzdi, sumpaiy bolady. Muny ylǵi aitamyn da júremin. Biraq áli de kóp aitý kerek, sharshamaý kerek.
Sondyqtan tynbai kúresý kerek – áitpese ómirge ne úshin kelip, ne úshin kettim deimin, eger deni durys qoǵam qurýǵa kómektespesem? Sonda meniń urpaǵym da iteńdep qyryq jyl jumys istep, para berip, ótirik sóilep ómir súrý kerek pe?
Sol úshin eshqaisymyz esh nársege beijai qaramaýymyz kerek, árbir azamat belsendi bolý kerek. Bul úshin zańdy, júieni ózgertý kerek. Qoǵamnyń músheleri osyǵan atsalysýymyz kerek, – degen edi rejisser Bolat Atabaev Azattyq radiosyna bergen suqbatynda.
