قارالى حاباردى الەۋمەتتىك جەلىدەگى مارقۇممەن جاقىن ارالاسقان قاۋىم قالىڭ جۇرتشىلىققا جەتكىزدى.
"قازاق دەپ ەڭىرەپ، ارپالىسىپ، ءومىرى كۇرەسپەن ءوتىپ و دۇنيەگە وزدى. بولات اتابايەۆ اعامىز تەاتر رەجيسسەرى، دراماتۋرگ، قوعام قايراتكەرى، "العا" ساياسي ۇيىمىنىڭ مۇشەسى، جاڭاوزەن قىرعىنى ءۇشىن قىلمىستىق قۋدالاۋعا ۇشىراعان ازامات ماڭگىلىك مەكەنىنە جول تارتىپتى. يمانىڭىز سالامات بولسىن! سوڭعى جىلدارى المانيادا تۇردى، بىلگەندەي بيىل ەلىمىزگە قايتىپ ەدى"، – دەپ جازدى قوعام بەلسەندىسى عابيدەن جاكەي.
"بولات اعا ەكەۋىمىز وتتان دا، سوتتان دا، تۇرمەدەن دە بىرگە وتتىك. جاڭاوزەندە ادىلدىك ءۇشىن كۇرەستىك، سول ءۇشىن قۋعىندالدىق تا. “ستولىپين” دەپ اتالاتىن سوتتالعانداردى تاسيتىن ۆاگوندا بىرگە جۇردىك. اۋزىنا قانت سالىپ، ءتاتتى سۋ بەرىپ جانىن الىپ قالعان ەدىك 2012 جىلى…"، – دەپ جازدى وپپوزيسيونەر جانبولات ماماي.
بۇدان بۇرىن اتابايەۆتىڭ جانساقتاۋ بولىمىنە تۇسكەنى حابارلانعان بولاتىن. مارقۇمنىڭ قارىنداسى رەجيسسەردىڭ بۇيرەك اۋرۋىمەن جانە قانت ديابەتىمەن اۋىراتىنىن ايتقان. بىلتىرعى رەجيسسەردىڭ اياعىنىڭ تىزەدەن تومەنگى بولىگىنە امپۋتاسيا جاسالعان. ول بىرنەشە كۇن ەسسىز كۇيدە جاتقان. ەسىن جيعان سوڭ ءبىر مەزەت Facebook-تا دا شاعىن جازبا قالدىرعان ەدى.
بولات ماناش ۇلى اتابايەۆ 1952 جىلدىڭ 14 مامىرىندا الماتى وبلىسىنداعى تەنتەن اۋىلىندا ومىرگە كەلدى.
2012 جىلى «اقساراي» تەاترىنىڭ رەجيسسەرى، قوعامدىق بەلسەندى بولات اتابايەۆقا قازاقستان بيلىگى «الەۋمەتتىك ارازدىق تۋعىزدى» دەگەن ايىپ تاقسا، گەرمانيانىڭ مادەنيەت ينستيتۋتى ونى مادەني قارىم-قاتىناس سالاسىنداعى ەرەكشە ەڭبەگى ءۇشىن «گەتە مەدالىمەن» ماراپاتتادى.
رەجيسسەر بولات اتابايەۆتىڭ ازاماتتىق قوعام مادەنيەتى، بيلىك جونىندە ءار جىلدارداعى پىكىرلەرى جۇرتشىلىق نازارىن اۋداردى. ول «بيلىكتىڭ ءسوزى مەن ءىسى الشاقتاپ كەتكەنىن» ايتقان.
– بيلىكتى تىڭداساڭ – سوزدەرى جاقسى، ىستەگەن ىسىنە قاراساڭ – قۇسقىڭ كەلەدى. مۇنى كورىپ وسكەن جاستار دا ەكىجۇزدى، سۇمپايى بولادى. مۇنى ىلعي ايتامىن دا جۇرەمىن. ءبىراق ءالى دە كوپ ايتۋ كەرەك، شارشاماۋ كەرەك.
سوندىقتان تىنباي كۇرەسۋ كەرەك – ايتپەسە ومىرگە نە ءۇشىن كەلىپ، نە ءۇشىن كەتتىم دەيمىن، ەگەر دەنى دۇرىس قوعام قۇرۋعا كومەكتەسپەسەم؟ سوندا مەنىڭ ۇرپاعىم دا يتەڭدەپ قىرىق جىل جۇمىس ىستەپ، پارا بەرىپ، وتىرىك سويلەپ ءومىر ءسۇرۋ كەرەك پە؟
سول ءۇشىن ەشقايسىمىز ەش نارسەگە بەيجاي قاراماۋىمىز كەرەك، ءاربىر ازامات بەلسەندى بولۋ كەرەك. بۇل ءۇشىن زاڭدى، جۇيەنى وزگەرتۋ كەرەك. قوعامنىڭ مۇشەلەرى وسىعان اتسالىسۋىمىز كەرەك، – دەگەن ەدى رەجيسسەر بولات اتابايەۆ ازاتتىق راديوسىنا بەرگەن سۇقباتىندا.
