Raıymbek aýdanynda oblys ákimi A. Batalov birneshe nysandy aralady. Atbasyn burǵan alǵashqy nysan – Tekes aýylyndaǵy servıstik daıyndaý ortalyǵy. Ótken jyly oblys búdjetinen kartop óndirisin damytý úshin arnaıy SDO quryp, tehnıkalar alýǵa 500 mln teńge bólingen bolatyn.
Sol kómektiń arqasynda 3 SDO jasaqtalyp, 458 mln. teńgege jalpy sany 87 birlik tehnıka satyp alynǵan, sonyń ishinde 21 traktor, 5 kombaın bar.
Qalǵan somaǵa aldaǵy ýaqytta tehnıkalar taǵy da tolyqtyrylatyn bolady. SDO-nyńtemir tulparlaryn tizgendeýge jas mamandar Almatydan arnaıy shaqyrylǵan. Olardyń arasynda týǵan jerden jyraqqa ketken narynqoldyq jastar da bar.
Raıymbek aýdandyq aýyl sharýashylyǵy bóliminiń basshysy Nurlan Oralqulovtyń aıtýynsha, bıyl aýdanda kartop 6 myń gektarǵa sebilip, odan 123 myń tonna ónim alý josparlanyp otyrǵanyn tilge tıek etti.
2018 jyly oblystyq ákimdik kómegimen 240 tonna golandıalyq «Sante» jáne «Agrıa» sorttary satyp alynyp, sol sorttardyń tuqymdary byltyr 70 gektarǵa sebilse, bıyl bul kórsetkish 10 esege ósip, 700 gektarǵa jetken.
Jańa tuqymnyń, jańa tehnologıanyń arqasynda ónimdilik te artty. Buryn ár gektarynan 170-180 sentnerden kartop alynatyn bolsa, qazir bul kórsetkish 380 sentnerge jetken.
Alqap basynda «Órken» jáne «Mıras» sharýa qojalyqtarynda ósirilgen kartoptyń túrli sorttarynyń ónimderi kórsetildi.«Órken» SHQ basshysy Talǵat Núsipqojaevtyń sózine súıensek, «Sante» sortyn óńdeýge chıpsy shyǵaratyn kásiporynmen kelissózder júrgizilýde. Sonymen birge osy aýdanda kartopty óńdep, krahmal daıyndaıtyn zaýyt ashýǵa usynys túskeni jáne ony júzege asyrýdyń múmkindikteri qarastyrylyp jatqany aıtylyp, sharýalar oblys basshylyǵynan osy bastamaǵa qoldaý tanytýdy surady.
Óz kezeginde Almaty oblysy ákimi Amandyq Batalov ıgi bastamaǵa tıisti kómek kórsetýge ázir ekenin jetkizip, naqty joba-josparlaryn birge talqylaýǵa shaqyrdy. «Shıkizatty mol ári sapaly óndiretin aımaqty óńdeýshiler ózderi izdep keledi, bul – naryqtyń, bıznestiń zańdylyǵy. Mundaı bastamalardy qashanda qoldaýymyz kerek» dedi ákim.
Munan soń oblys basshysy Narynqol aýylynda qurylysy júrip jatqan birqatar mekemeler ǵımarattaryn aralap kórdi. Mundaǵy sporttyq-saýyqtyrý kesheniniń qurylysyn «FýdMS» JSHS júrgizýde.
Quny 1,1 mlrd teńgege jýyq ǵımarat 4 myń sharshy metrdi quraıdy. Qurylys alańynda jumys qyzý júrip jatyr. Sol sıaqty 83 jeke turǵyn úı túsetin oryndy kórip, onyń jobasymen tanysty.
Oǵan qosa respýblıkalyq baǵynystaǵy memlekettik mekemeler ornalasatyn ǵımarat, «Azamattarǵa arnalǵan úkimet», servıstik ákimdik, aýdandyq ákimdik ǵımarattarynyń qurylysyn aralaǵan oblys basshysy jumystyń sapasyna nazar aýdardy.
Ǵımarattar aýlalaryna tóseletin tastar men plıtkalardyń, ornatylatyn qorshaýlardyń úlgileri kórsetilip, abattandyrý josparlary tanystyryldy. Oblys ákimi merdiger uıymdarǵa jumys kestesinen keshikpeýdi, oǵan qosa qurylysty sapaly júrgizýdi, ǵımarattardyń belgilengen merziminde iske qosýǵa daıyn bolýy kerektigin qatań eskertti. Máselen, «Azamattarǵa arnalǵan úkimet» ǵımaratyn merdiger mekeme «Kerýen Servıs» seriktestigi ókili qarasha aıynda aıaqtaıtyndaryn aıtsa, qaıta jańǵyrtylyp jatqan aýdandyq ákimdik ǵımaratynyń ishki árleý jumystary ǵana qalǵan.
Oblys ákimi A. Batalov jańa qurylǵan aýdannyń áleýmettik-ekonomıkalyq damýyndaǵy eleýli ózgerister týraly jáne aldaǵy mindetter jaıynda aıtyp ótti.
– Jańa aýdandaǵy jumys qarqyndy.Halyqqa qyzmet kórsetetin túrli mekemeler salynyp, bar ǵımarattardy qaıta jańǵyrtyp, jańalap jatyrmyz. Narynqol aýylyn kógaldandyrýǵa, joldardy jóndeýge, kósheni jaryqtandyrýǵa, balalardyń oıyn alańdary men sporttyq alańdaryn salýǵa, turǵyn úılerdiń aýlalaryn kórkeıtýge, qaı jaǵynan bolsyn aýdan azamattary, oblystyń árbir aýdan, qalasy óz úlesterin qosýda. Narynqol óńiriniń, ásirese, aýyl sharýashylyǵyndaǵy múmkindigi kóp. Raıymbek aýdanyna kartopty óndiristik masshtabta ósirýge jasaǵan memleket qoldaýy óz nátıjesin berip otyr. Jas mamandar týǵan jerge oralýda. Tehnıkalar jańardy, tolyqty. Degenmen tehnıkany kútip-baptaýdy – jabyq shatyrdyń astynda ustaý,maılaý, kóktemgi-kúzgi naýqanǵa daıyndaý sharalaryn júrgizýdi umytpaý kerek. Sonda ǵana tehnıka uzaq jyl senimmen qyzmet etedi. Oblys boıynsha ırrıgasıalyq júıelerdi qalpyna keltirý jumysyna kiristik. Sonyń nátıjesinde bir ǵana Raıymbek aýdanynyń ózinde 6 myń gektar jer qalpyna keltiriledi. Iaǵnı kartop óndirisin odan ári damytýǵa múmkindik molaıady degen sóz. Biz óz tarapymyzdan aýyldyń eńbekker halqyna qoldaý kórsetip, aýyl sharýashylyǵyn órkendetýdi jalǵastyratyn bolamyz, – dedi A. Batalov.
Almaty oblysy ákiminiń baspasóz qyzmeti
