Elbasy Nursultan Ábishuly Nazarbaevtyń Jetisýdyń aýyl sharýashylyǵy salasynyń áleýetin arttyrý tapsyrmasyna sáikes osy baǵytta sharýalarǵa memleketten jan-jaqty qajetti qoldaý kórsetilip jatqany belgili. Máselen, Narynqoldyń ataǵy shartarapqa taraǵan kartoptaryna degen suranys óte joǵary. Kartopty qaita óńdeý men fri kartoptaryn shyǵaratyn transulttyq gollandiialyq «Farm Frites» kompaniiasynyń ókilderi Qazaqstandy aralap shyǵyp, aqyry osy Narynqoldyń kartoptaryna toqtalǵan.
Jeri qunarly, teńiz deńgeiinen 1800 metr biiktikte ornalasqan, kartop tuqymy sapaly, túrli aýrýlarǵa tózimdi. Túni salqyn aýdanda kartopqa áýes ziiankester joqtyń qasy. Sondyqtan ony túrli dári-dármekpen ýlaýdyń da qajeti shamaly. Kartoptary iri, ekologiialyq taza ári sapaly. Mine, osynyń barlyǵy Narynqoldyń kartoptaryn tańdaýda sheshýshi faktor boldy.
Aýdanda kartop ósirýmen ainalysatyn «Órken», «Rinat», «Erkin», «Rýslan», «Aqjol» sharýa qojalyqtary da biyl mol ónim jinaýdan úmitti. Gollandiiadan osy óńirge beiimdelgen kartoptyń 236 tonna sýper elitalyq eki sortynyń tuqymdary ákelingen bolatyn. Biyl sharýalarǵa memleket tarapynan kórsetiletin kómektiń barlyǵy ýaqytyly berilip, jaqsy daiyndyqtyń nátijesinde jiyn naýqanynda qandai da bir kedergiler bolmady.
Oblys basshylyǵy aýdan ákimi men sharýalardyń bastamalaryn qoldaýǵa árqashanda daiyn. Bólingen qarajatqa aýdandaǵy 2 servistik daiyndaý ortalyǵyna qajetti sońǵy úlgidegi qýattylyǵy men sapasy joǵary barlyq tehnikalar men qondyrǵylar satyp alyndy. Odan bólek, tapsyrys berilgen 3 kombain, 6 traktor, tirkemesi bar Kamaz kóligi, 4 dana dári shashý agregaty, 3 dana sorttaý jáne 2 dana qabyldaý pýnktteri jiyn-terin naýqanyna ýaqytyly jetkizildi. Aldaǵy maýsymda taǵy da qajetti tehnikalar jetkiziletin bolady.
Osylaisha aýdan basshylarynyń alǵa qoiǵan kartop óniminiń kólemin 10 esege arttyrý boiynsha mejelegen maqsaty oryndaldy dep nyq senimmen aitýǵa bolady. Ár gektardan ortasha 30 tonnadan ónim jinalyp, qoimaǵa 2360 tonna tuqymdyq kartop salynady. Kelesi jyldyń jospary budan da aýqymdy. Aldaǵy kóktemde sharýalar 780 tonna kartop egýdi mejelep otyr.
Eń bastysy gollandiialyq kartop tuqymynyń jersinýine qatysty sharýalardyń kúmáni seiilip, táýekelge bel býǵan azamattardyń eńbekteri aqtaldy degen sóz. Osyǵan kózi jetken ózge aýyl turǵyndary da kelesi kóktemde ózderine tiesili jer telimderine kartop egýge bilek sybana kiriskeli otyr.
Almaty oblysy ákiminiń baspasóz qyzmeti
