Qazaqstan Syrtqy ister ministrligi Ýkraina drondary Reseige Qazaqstan aýmaǵy arqyly jetkizildi degen aqparatqa qatysty pikir bildirdi, dep habarlaidy Dalanews.kz.
Ministrlik ókili Aibek Smadiiarov bul málimetterdi rastaýǵa negiz joǵyn atap ótti.
"Men áskeri sarapshy emespin. Iá, búgin tańerteń bul habarlamalardy kórdim. Ony kóbine anonimdi Telegram-arnalar taratyp jatyr. Bul aqparatty rastaityn resmi derek joq. Sondyqtan men ony ne rastai almaimyn, ne joqqa shyǵara almaimyn. Muny áskeri sarapshylardyń boljamy retinde qarastyrǵan durys", – dedi SIM ókili.
Aita keteiik, jeksenbi kúni ýkrainalyq drondar Reseidiń birneshe áskeri aerodromyna shabýyl jasap, saldarynan 40-tan astam áskeri áýe kemesi zaqymdanǵan. Bul týraly Ýkraina Qaýipsizdik qyzmetindegi derekkózge silteme jasaǵan birqatar sheteldik BAQ habarlady. Atalǵan shabýyl Reseidiń Ýkrainaǵa basyp kirgeli bergi eń iri dron soqqysy retinde sipattaldy.
Zaqymdanǵan ushaqtardyń qatarynda strategiialyq mańyzy bar A-50, Tý-95 jáne Tý-22M3 úlgileri de bar ekeni aityldy.
Resei Qorǵanys ministrligi shabýyl faktisin rastady. Vedomstvonyń resmi habarlaýynsha, Irkýtsk jáne Mýrmansk oblystarynda ornalasqan áskeri aerodromdar FPV-drondardyń soqqysyna ushyrap, birneshe áýe tehnikasy órtengen. Degenmen naqty qansha ushaqtyń isten shyqqany kórsetilmegen.
Budan bólek, shabýyldar Reseidiń taǵy úsh aimaǵyn qamtyǵan: Ivanovo, Riazan jáne Amýr oblystary. Qorǵanys ministrligi bul óńirlerdegi dron soqqylarynyń sátti toitarylǵanyn, zardap shekken tehnika joq ekenin málimdedi.
Vedomstvo bul áreketterdi «Kiev rejiminiń teraktisi» dep baǵalady.
