Radikaldy dini aǵymdaǵy azamattar jaýapkershilikke tartylady
Jalpy, komitet ókiliniń aitýynsha, qoldanystaǵy zań normalary ulttyq qaýipsizdikke qaishy keletin dini qyzmetti toqtatýǵa múmkindik beredi. Sonymen birge, osy quqyqtyq múmkindikter odan ári jetildirýdi qajet etedi.
– Zańnamadaǵy bizdiń usynystarymyz missioner retinde tirkelmegen dini ilimderdi taratý jónindegi qyzmetke jol bermeýdi kózdeidi. «Dini qyzmet jáne dini birlestikter týraly» zańdaǵy missionerlik qyzmetke qatysty normany aýystyrýdy usyndyq. Bul dini ilimdi taratatyn, ásirese missioner retinde tirkelmegen radikaldy dini aǵymdardyń jolyn qýýshylardy jaýapkershilikke tartýǵa múmkindik beredi, – deidi B.Kúlekeev.
Budan bólek, dini mazmundaǵy aqparattyq materialdardy, dini ádebietterdi daiyndaý, basyp shyǵarý, taratý jáne ákelýge baqylaý kúsheitilmek. Onyń aitýynsha, qosymsha norma zańnamadaǵy kemshilikterdi joiady.
– Zańnyń 9-baby 3-tarmaǵyna sáikes dintaný saraptamasyn júrgizbesten ákelinetin ádebietterdiń sandyq kórsetkishin engizý tiisti ádebietti ákelý protsesin retteidi dep oilaimyz. Osy quqyqtyq kemshilikti joiý, álbette, quqyqqa qaishy keletin, sonyń ishinde ekstremistik mazmundaǵy dini materialdardy anyqtaityn baqylaý júiesin jetildiredi, – deidi ol.
Taǵy bir mańyzdy másele – dini týrizmdi júzege asyrý tártibin retteý. Osy rette, «Týristik qyzmet týraly» zańǵa azamattardyń shetelge qajylyqqa barý tártibin memlekettik organdar anyqtaityn normalar engizý kózdelip otyr.
– Osylaisha, qajylyqqa barǵan azamattarymyzdyń radikaldy ideologiiamen ýlaný múmkindigin aitarlyqtai qysqartamyz. Jalpy, biz usynǵan zańnamalyq sharalar vedomstvoaralyq jumys tobynda biraýyzdan qabyldandy, – deidi Din isteri komiteti tóraǵasynyń orynbasary.
Sonymen qatar, ministrlik uiymdastyrýshylyq-institýtsionaldy baǵyttaǵy keshendi sharalardy júzege asyrmaq. Birinshiden, 1 jeltoqsanǵa deiin dini jinalystardy jáne joralardy júrgizý, missionerlik qyzmet etý, sonymen birge, eldegi dini ádebietterdiń ainalymy máseleleri boiynsha zańnamany buzýǵa jol bermeý týraly turǵyndar arasynda qosymsha aqparattyq jáne túsindirý jumystaryn júrgizý josparlanǵan.
– Ekinshiden, Ishki ister ministrligimen birlese otyryp, dini jinalystardy ótkizý, qulshylyq etý, dini joralar men rásimder júrgizý, missionerlik qyzmet pen dini ádebietterdiń ainalymyna baqylaýdy qamtamasyz etý boiynsha memlekettik organdar úshin ádistemelik usynymdardy ázirleý kerek. Jalpy, din salasyndaǵy máselelerdi retteý boiynsha basqa da memlekettik organdarmen tiisti jumystar júrgizilýde jáne osy qolǵa alynyp otyrǵan keshendi sharalar óz nátijesin beredi dep sanaimyz, – deidi komitet ókili.
Aiymgúl ÁBILEVA
