Qyzylorda oblysynda hokkei jattyqtyrýshysy kámeletke tolmaǵan qyzǵa qatysty birneshe jyl boiy jynystyq sipattaǵy qylmys jasaǵan degen kúdikke ilindi, dep habarlaidy dalanews.kz.
Jábirlenýshiniń aitýynsha, oqiǵa 2024 jyly, ózi 14 jasta bolǵan kezde bastalǵan. Sol jyly qyz kógaldaǵy hokkeiden jarysqa qatysý úshin komandasymen birge Taldyqorǵanǵa barǵan.
Onyń sózinshe, bir kúni páterde jalǵyz qalǵan kezde jattyqtyrýshy oǵan shai ákelip bergen. Osydan keiin qyz bolǵan oqiǵalardy esine túsire almaitynyn aitqan. Tańerteń oianǵanda qasynda jattyqtyrýshy bolǵanyn baiqaǵan.
Jábirlenýshi jattyqtyrýshynyń bolǵan jaitty videoǵa túsirgenin aityp, ony ata-anasyna kórsetemin jáne ózgelerge taratamyn dep qorqytqanyn málimdedi. Qyzdyń aitýynsha, osydan keiin ol uzaq ýaqyt boiy bopsalaýǵa ushyraǵan.
Sondai-aq jábirlenýshi 38 jastaǵy jattyqtyrýshy ózin aqsha úshin basqa er adamdarǵa da bergenin alǵa tartty. Qyz bul jaǵdai týraly týystaryna tek eki jyldan keiin ǵana aitqan. Oqiǵa belgili bolǵannan keiin jábirlenýshiniń týystary men jattyqtyrýshy arasynda janjal shyqqany habarlandy. Sonyń saldarynan qyzdyń aǵasy ýaqytsha ustaý izoliatoryna qamalyp, anasy úiqamaqqa alynǵan.
Qyzylorda oblystyq politsiia departamentiniń málimetinshe, is boiynsha eki kúdikti – jattyqtyrýshy men onyń tanysy ustalǵan. Sot sanktsiiasymen ekeýi de qamaýǵa alynǵan. Qylmystyq is boiynsha tergeý aiaqtalǵan. Qazirgi ýaqytta protseske qatysýshylar is materialdarymen tanysyp jatyr. Tergeý múddesine bailanysty ózge málimetter jariialanbaidy.
