Almaty oblysy Balqash aýdanyna qarasty Araltóbe aýylynyń turǵyndary eldi meken mańyndaǵy jaiylymdyq jáne shabyndyq jerdiń jyrtylyp jatqanyna alańdaýshylyq bildirdi. Olar oblys ákimi Shyńǵys Sairanulyna úndeý jasap, máseleni baqylaýǵa alýdy surady, dep habarlaidy dalanews.kz.
Áleýmettik jelide taraǵan videoda aýyl turǵyny jerdiń qyzyl miia tamyryn alý úshin qazylyp jatqanyn aitady. Onyń sózinshe, jumys Ile men Topar ózenderiniń aralyǵynda, sý arnalaryna jaqyn aýmaqta júrgizilip jatyr.
«Ózińiz kórip turǵandai, bul – aýyldan shamamen eki shaqyrym jerdegi jaiylymymyz. Qyzyl miianyń tamyryn alý úshin jerdiń bárin túgel jyrtyp jatyr. Bir jaǵynda Ile ózeni, ekinshi jaǵynda Topar ózeni ornalasqan. Ózenge deiingi aralyq shamamen on metr ǵana», – deidi turǵyn.
Aýyl halqy atalǵan aýmaqty buǵan deiin mal jaiýǵa jáne shóp shabýǵa paidalanǵanyn jetkizdi. Olardyń aitýynsha, jerdiń ústińgi qabaty tereń qazylǵandyqtan, keiin bul aýmaqta ósimdik shyqpai qalýy múmkin.
«Bizdiń janaiqaiymyz – mal baǵatyn jerimiz qalmai barady. Osy jerden shóp shaýyp júrgen edik, endi odan da aiyryldyq. Jerdiń bir metrge jýyq qabatyn qazyp jatyr. Budan keiin munda shóp shyqpaidy», – dedi úndeý avtory.
Turǵyndar eki jyl buryn da ózenniń arǵy betindegi aýmaqtyń jyrtylǵanyn málimdedi. Ol kezde jerge jońyshqa nemese basqa daqyl egiletini aitylǵanymen, keiin eshteńe egilmegen. Sonyń saldarynan aýmaq qazir shań basqan bos jerge ainalǵanyn aitady.
Úndeý avtorynyń sózinshe, aýyl irgesindegi 180 gektar jer kezinde jalǵa berilip, keiin jeke menshikke ótip ketken. Bul jaǵdaidan aýdan jáne aýyl ákimdikteri habardar.
«Aýdan ákiminiń aitýynsha, jerdiń qujattary durys, ol qyzmetke kelgenge deiin satylyp ketken. Biraq biz endi malymyzdy qaida baǵamyz? Aýyl osy jerden nebári 2 shaqyrym 200 metr qashyqtyqta ornalasqan. Búkil Araltóbe aýyly turǵyndarynyń atynan osy máselege shara qoldanyp, kómektesýlerińizdi suraimyz», – dedi ol.
Ázirge Balqash aýdanynyń ákimdigi men jerge ielik etetin tarap turǵyndardyń shaǵymyna resmi túsinikteme bergen joq. Sondai-aq aýmaqtaǵy jumystyń zańdylyǵy men onyń sý qorǵaý aimaǵyna qatysy jóninde quzyrly organdardyń qorytyndysy jariialanbaǵan.
