Kásipker Tursynǵali Alagózov Forbes jýrnalynyń 2026 jylǵy eń bai qazaqstandyqtar reitinginde birneshe satyǵa joǵarylady, dep habarlaidy dalanews.kz.
Basylym deregine sáikes, kásipkerdiń qazirgi bailyǵy 160 million dollarǵa baǵalanǵan. Osy kórsetkishpen ol reitingtiń 58-ornyna jaiǵasqan.
Salystyrmaly túrde aitsaq, ótken jyly Alagózovtiń kapitaly 130 million dollar dep eseptelip, ol tizimde 61-orynda turǵan. Osylaisha bir jyl ishinde kásipkerdiń dáýleti shamamen 30 million dollarǵa ósken.
Alaida Forbes onyń bailyǵynyń artýyna naqty qandai faktorlar áser etkenin egjei-tegjeili túsindirmegen.
Tursynǵali Alagózov – Qazaqstan men Ortalyq Aziiadaǵy alkogolsiz sýsyn óndiretin iri kompaniialardyń biri GALANZ Bottlers-tiń iesi ári direktorlar keńesiniń tóraǵasy.
Kásipker 2024 jyly Shymkent syra zaýytyn satyp alǵan. Ashyq derekterde onyń kásiporynǵa shamamen 40 million dollar investitsiia salǵany aitylady.
Sonymen qatar Alagózov 2026 jyly zaýyttyń óndiristik qýatyn aiyna 10 myń tonna syraǵa deiin jetkizýdi josparlaǵan.
Kásipker buǵan deiin qyzmetkerlerine páter syilap, kópshiliktiń yqylasyna bólengen edi.
