2026 jyldan bastap quny 77 mln 850 myń teńgeden, iaǵni 18 myń AEK-ten asatyn jeńil avtokólik satyp alǵan azamattar mámile somasynyń 10 paiyzy kóleminde salyq tóleýge mindetti. Bul týraly Almaty qalasy boiynsha Memlekettik kirister departamenti málimdedi, dep habarlaidy dalanews.kz.
Salyq mólsherlemesi kóliktiń shekti baǵadan qanshalyqty qymbat ekenine qaramastan, satyp alý-satý shartynda kórsetilgen tolyq qunǵa esepteledi. Máselen, 80 mln teńgelik avtokólik úshin 8 mln teńge, 100 mln teńgelik kólikke 10 mln teńge, al 150 mln teńge turatyn mashinaǵa 15 mln teńge salyq tólenedi.
Vedomstvonyń túsindirýinshe, bul tólem jyl saiynǵy kólik salyǵyn almastyrmaidy. Ol qymbat avtokólik satyp alynǵan kezde bir ret qana tólenetin bólek mindetteme sanalady.
Satyp alýshy mámile jasalǵan aidan keiingi aidyń 20-syna deiin salyqty tólep, 400.00 nysanyndaǵy deklaratsiiany tapsyrýy kerek. Belgilengen merzim ótip ketken jaǵdaida ósimpul eseptelip, keiin bereshekti májbúrlep óndirý sharalary qoldanylýy múmkin.
Salyq mindettemesi tek avtokólikti satyp alý-satý kezinde týyndaidy. Eger iesi tiisti salyqty tólegennen keiin kóligin týysyna syiǵa tartsa, ony alǵan adam qaitadan tólemeidi. Al mashina keiin satylǵan jaǵdaida jańa satyp alýshy salyqty qaita tóleýge mindetti. Kólikti bastapqy baǵasynan qymbatqa satqan azamat tabysyn 270.00 nysany arqyly deklaratsiialaýy qajet.
