Áleýmettik jelide "gúl urysy" retinde tanymal bolǵan burynǵy politsiia qyzmetkeriniń taǵy bir videosy tarap ketti. Bul joly ol mekemede áieldiń telefonyn tartyp alǵany aitylady. Osy jaitqa politsiia pikir bildirdi, - dep habarlaidy Dalanews.kz.
"Bul derek boiynsha politsiiaǵa eshqandai aryz túsken joq. Qazir oqiǵanyń mán-jaiyn anyqtaý úshin videoda kórsetilgen adamdardy anyqtaý boiynsha jumys júrgizilip jatyr.
Sonymen qatar, M. Bekov Ishki ister organdary qyzmetkeri emes ekenin habarlaimyz", - dep jazylǵan Shymkent Politsiia departamentiniń baspasóz qyzmetiniń habarlamasynda.
Jergilikti Elitar basylymy málimetinshe, jelide tarap ketken video keiipkeri 2023 jyly Shymkenttegi gúl dúkeninde jónsiz áreket jasady dep aiyptalǵan politseige uqsaidy.
Bul jolǵy oqiǵa Shymkent qalasyndaǵy meiramhanalardyń birinde bolǵan. Telefonyn qaitarýdy suraǵan áielge burynǵy politsiia qyzmetkeri jaýap bermeidi.
"Ákel telefonymdy. Telefondy alyp kel dedim saǵan! Ishkenińe tólei almaisyń ǵoi qazir. ...Myna kisi aityp jatyr me edińder? Ishkenine tólep alsyn. Meniń telefonymdy kepilge tastamaqshy. Jaqsylap telefonǵa túsirshi. Sol gúlge aqsha tólei almaityn jigit qoi", - dedi videoda áiel.
Kadrlardan oqiǵa kýágerleri áielge kómekteskisi kelgeni kórinedi. Alaida er adam olardyń da sózine qulaq aspaidy.
“Meniń telefonym, sony ala sal. Saǵan syiladym. Mende telefon joq, kólikte”, – deidi er adam.
Sonymen qatar, jeli qoldanýshylary eks-politsei basqa adamdardyń zattaryn alyp qoiatyn ádetin qoimaǵanyna ashynǵan.
Al 2023 jyly ol florist qyzǵa qol kóterip, aqysyn tólemei bir qushaq gúldi alǵan. Sol kezde Ishki ister ministrligi eki bap boiynsha kinálini jaýapqa tartýǵa ýáde berdi: "tonaý" jáne "salǵyrttyq".
