Atalǵan zań negizinen Tótenshe jaǵdailar jónindegi ortalyqty qurý men jumys isteýi jáne Qazaqstan Respýblikasynyń aýmaǵynda dúlei zilzalalar qaýpin azaitý máselelerin kózdeidi.
Jiynda sóz alǵan senator Bibigúl Jeksenbai, qazirgi kezeńde tótenshe jaǵdailardyń aldyn-alý jáne onyń qaýpin azaitý óte ózekti máselelerdiń birine ainalyp otyrǵanyn atap ótti.
"Sebebi, sońǵy jyldary elimizde tirkelgen tabiǵi jáne tehnogendik sipattaǵy tótenshe jaǵdailardyń jiileýi osy saladaǵy kem-ketikterimizdi kórsetip berdi. Tiisinshe, biz osy baǵytta júieli túrde jumystardy júzege asyrýǵa tiispiz", – dedi ol.
Onyń málim etkenindei elimizdegi, tipti Ortalyq Aziiadaǵy tótenshe jaǵdai qyzmetiniń kásibi qutqarýshylaryn ázirleitin birden-bir oqý orny - QR TJM M. Ǵabdýllin atyndaǵy azamattyq qorǵaý akademiiasy 26 jyldan beri kásibi qutqarýshylardy daiarlap keledi. Biraq, akademiianyń qazirgi jaǵdaiy múshkil, akademiia zamanaýi tehnikalyq qural-jabdyqtarmen qamtamasyz etilmegen.
Prezident Toqaev aqpan aiyndaǵy sapary barysynda Akademiianyń jańa kesheniniń qurylysyn bastap, 2026 jyldyń sońyna deiin aiaqtaýdy tapsyrǵan bolatyn.
"Osy jyldyń naýryz aiynda Halyqaralyq qatynastar, qaýipsizdik jáne qorǵanys komitetiniń músheleri de Aqmola oblysyna baryp, akademiianyń oqý úderisi, tehnikalyq bazalarymen tanysyp, máselelerdiń kóptigine kóz jetkizdik. Jatyn orny men isher asynyń da sapasy syn kótermeidi. Ashana ornalasqan ǵimarat apatty jaǵdaida bolǵandyqtan, kýrsanttar aqpan aiynan beri qashyqtyqtan oqyp jatyr. Qutqarýshylardy ailap onlain oqytý degen oiǵa qonymsyz", - degen Bibigúl Jeksenbai osy rette premer Smaiylovqa depýtattyq saýal joldady
Depýtattyq saýalda:
Memleket basshysynyń Akademiianyń jańa keshenin (oqý-zerthanalyq, sporttyq korpýstar, ashana, jataqhana jáne t.b.) salý jónindegi tapsyrmasyn ýaqtyly oryndaý úshin barlyq vedomstvoaralyq rásimderdi jedel júrgize otyryp, respýblikalyq biýdjetten qarjy bólýdi qamtamasyz etý kerek;
osy saladaǵy kadrlardy daiarlaý men qaita daiarlaýdyń úzdiksiz protsesin qamtamasyz etý;
- akademiianyń tynys-tirshiligin qamtamasyz etetin qoldanystaǵy ǵimarattar men qurylystardy jóndeýdi júzege asyrýǵa, qazirgi zamanǵy talaptarǵa sáikes keletin jabdyqtar men zerthanalardy satyp alýǵa qarajat bólý;
- akademiianyń professorlyq-oqytýshylyq quramynyń aqshalai qarajaty mólsherindegi teńsizdikti qarastyrý jáne joiý;
- oqý protsesine sheteldik ǵalymdar men jetekshi mamandardy tartý, sondai-aq ǵylymi-zertteý jáne tájiribelik-konstrýktorlyq jumystardy (ǴZTKJ) oryndaýǵa nysanaly granttar bólý, memlekettik tapsyrystardy ornalastyrý múmkindigin qarastyrý qajettiligin atap ótilgen.
"Qutqarýshylardy tek tótenshe jaǵdaida emes, ai kúnniń amanynda nazarǵa alyp, jaǵdaiyn jasaý - paryzymyz", – deidi senator.
