5-shi Dúniejúzilik kóshpendiler oiyndary qarsańynda qusbegiler Aqmola oblysynda oqý-jattyǵý jiyndaryn ótkizip jatyr.
Qusbegilik (saiatshylyq) federatsiiasynyń atqarýshy direktory Bazarbek Kúntýǵannyń aitýynsha elimizdiń úzdik qusbegileri Kóshpendiler oiyndaryna degen daiyndyqtaryn qyzdyra túsken.
«Shýchinsk qalasynda tamyzdyń 12-si men 25-si aralyǵynda ótetin oqý-jattyǵý jiynymyzda 9 sportshy búrkit, qarshyǵa jáne itelgi qustarymen jattyǵyp jatyr. Kelesi oqý-jattyǵý jiynymyz Astana qalasynda, 27-shi tamyz ben 7-shi qyrkúiek aralyǵynda bolady», - dep atap ótti B. Kúntýǵan.
Qusbegilikten ulttyq qurama músheleri daiyndyq barysy jaiynda aityp berdi.
«5-shi Dúniejúzilik kóshpendiler oiyndaryna daiyndalyp jatyrmyz. Bar bilgenimizdi, múmkinshiligimizdi paidalanamyz. Eýropadan, Mońǵoliia, Qyrǵyzstannan myqty qarsylastar keledi. Olar da baryn salary anyq», - deidi qusbegilikten ulttyq qurama múshesi Ibragim Bazarbaev.
«Shýchinsk qalasynda Kóshpendiler oiyndaryna daiyndyq ústindemiz. Qazir aldaǵy saiystaǵy úsh sanat boiynsha qatysatyn úsh búrkit, úsh itelgi, úsh qarshyǵany baptap jatyrmyz. Olar jaz boiy túlekte boldy. Endi etin tartyp, jyldamdyqqa daiyndaimyz. Al ózim dodaǵa Alǵyr atty búrkitpen qatysamyn», - dep atap ótti qusbegilikten ulttyq qurama múshesi Serikbek Kúntýǵanuly.
Kóshpendiler oiyndary aiasynda qusbegilikten (saiatshylyqtan) bolatyn saiys qyrkúiektiń 12-13 aralyǵynda, etnoaýyl aýmaǵynda ótedi.
Eske sala keteiik, Respýblikalyq «Qusbegilik» federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báige», «Sadaq atý», «Teńge ilý», «Aýdaryspaq», «Jamby atý», «Kókpar», «Asyq atý», «JORYQ» at sporty jáne t.b. federatsiialar bar. QR Ulttyq sport qaýymdastyǵyn Islambek Saljanov basqarady.
Atap óteiik, 8-13 qyrkúiekte Astana qalasynda 5-shi Dúniejúzilik kóshpendiler oiyndary ótedi. Is-sharaǵa 89 elden 2000-nan astam sportshy qatysady dep josparlanýda. 5-shi Dúniejúzilik kóshpendiler oiyndarynyń Bas demeýshisi - ALAGEUM ELECTRIC, Oiyndardyń Bas seriktesi - Halyk Bank. Astanada ótetin Dúniejúzilik kóshpendiler oiyndarynda barlyǵy 21 sport túrinen 97 medal jiyntyǵy sarapqa salynady.
