Qazaqstandyq boksshy, álem chempiony Temirtas Júsipovqa qatysty jubaiyn uryp-soqty degen kúdikpen qylmystyq is qozǵaldy, dep habarlaidy dalanews.kz.
Áleýmettik jelide sportshynyń jubaiynyń ápkesi Temirtas Júsipov áielin aiaýsyz soqqyǵa jyqqanyn málimdedi. Onyń aitýynsha, jábirlenýshi aýyr halde aýrýhanaǵa jetkizilgen. Meditsinalyq qujattarda tunshyǵý belgileri, basyndaǵy ashyq jaraqat, mi isinýi jáne qurysý tirkelgeni aitylǵan. Sondai-aq ol kúdikti ustalǵannan keiin birneshe saǵattan soń bosatylǵanyn jáne keiin áieline qysym kórsetkenin málimdedi.
Keiin Temirtas Júsipov Turar Media-ǵa bergen suhbatynda janjal kezinde jubaiyna qol kótergenin rastady. Alaida onyń aitýynsha, janjal áieliniń ózine kúsh qoldanýynan bastalǵan. Sportshy eki ret shapalaqpen urǵanyn, keiin áieli ózin tepkilep, kiltpen kózin shyǵarmaq bolǵanyn jáne qaishymen shabýyl jasaýǵa árekettengenin aitty.
Aqmola oblysy politsiia departamenti atalǵan fakti boiynsha qylmystyq is qozǵalǵanyn rastady. Qazirgi ýaqytta qajetti tergeý amaldary júrgizilip jatyr.
Sonymen qatar Aqmola oblysynyń dene shynyqtyrý jáne sport basqarmasy tergeý aiaqtalǵanǵa deiin qandai da bir qorytyndy jasaýǵa erte ekenin málimdedi. Vedomstvonyń habarlaýynsha, barlyq mán-jai quqyq qorǵaý organdarynyń tekserýinen keiin belgili bolady.
