Qurylys materialdaryn shyǵaratyn 5 jańa zaýyt salynady
Mineraldy jylytqyshtar, gazbetondy bloktar, qasbet plitalary, keramikalyq kirpishter, esik bloktary jáne laminattalǵan eden plitalary – osynyń bári jýyq jyldarda Jetisý óńirinde óndiriletin bolady. Bul óz kezeginde suranysqa ie qurylys materialdarynyń baǵasynyń tómendeýine, otandyq naryqty básekege qabiletti jergilikti ónimdermen tolyqtyrýǵa, sonymen qatar import almasý máselesiniń oń sheshilýine yqpal etpek. «Samuryq Qazyna Construction» AQ basqarma tóraǵasy Bolatqan Sandyqbaev kezdesýde osylaisha oi bólisti.
Almaty oblysynyń ákimi Amandyq Batalov jergilikti atqarýshy organdar tarapynan barlyq qajetti kómek kórsetiletinin aitty.
– Almaty oblysy qurylys kólemi jaǵynan, iaǵni turǵyn úilerdi kóptep salý jaǵynan erekshelenedi, sondyqtan bizge sapaly qurylys materialdary asa qajet. Endi qurylys materialdarynyń óz óńirimizde óndiriletindigi - ekonomikalyq mańyzdy oqiǵalardyń biri. Taldyqorǵanda zaýyttardy ornalastyrýǵa barlyq infraqurylymy tartylǵan indýstrialdy aimaq daiyn tur. Sondyqtan qurylys jumystaryna kirise berýlerińizge bolady. Bul barlyq 5 nysanǵa da qatysty. Biz óz tarapymyzdan tiisti kómekterdi kórsetemiz, – dedi A. Batalov.
Bolashaq zaýyttardyń óndiristik qýattylyǵy týraly aitatyn bolsaq, máselen, jylyna 7 myń tonna mineraldyq jylytqysh, 60 myń tekshe metr gazdy bloktar, 2 mln sharshy metr laminattalǵan eden plitalary, 1,5 mln sharshy metr qasbetke arnalǵan fibrotsement plitalary shyǵarylady dep josparlanǵan. Bul – ónimniń bir bóligi ǵana.
Atap ótsek, Taldyqorǵanda gazbeton bloktaryn jáne keramikalyq kirpishter shyǵarylmaq. Bul zaýyttardy merziminde iske qosý úshin oblys ákiminiń tapsyrmasymen jobalardy barlyq satysynda «Jetisý» ÁKK» ÓDI» AQ men oblystyq kásipkerlik jáne innovatsiialyq damý basqarmasy qoldaityn bolady.
Amandyq Batalov jiyn sońynda jańa import almasý óndirisi ónerkásip salasynyń damýyna eleýli úles qosatynyn, Almaty oblysynda qurylys materialdarynyń qaýipsizdigin qamtamasyz etip, jumyspen qamtýǵa oń yqpal etetinin atap ótti.
