Astana qalasy ákiminiń orynbasary Eset Baikenniń tóraǵalyǵymen T. Begeldinov atyndaǵy №1 mektep-litseiinde bilim basqarmasy, politsiia departamenti, prokýratýra jáne UQKD ókilderiniń, mektep jáne kolledj direktorlarynyń qatysýymen jedel keńes ótti, dep habarlaidy Dalanews.kz.
Keńes barysynda qala mektepterindegi jasóspirimdermen kezdesýde kóterilgen taqyryptar talqylanyp, vedomstvolardyń jaýapty músheleri bekitildi.
Sodan keiin keńes músheleri qala aýdandary boiynsha toptarǵa bólinip, 70-ten astam bilim uiymyn aralap, jasóspirimderge quqyq buzýshylyqtardyń aldyn alý maqsatynda túsindirme júrgizdi.
Jasóspirimdermen kezdesýde quqyq qorǵaý organdarynyń ókilderi zańdardy saqtaýdyń mańyzdylyǵyn eske saldy.
«Sizder 18 jasqa tolmaǵan bolsańyzdar da, óz áreketterińiz úshin jaýapkershilik kóteresizder. Keibir qylmystar boiynsha qylmystyq jaýapkershilik 14 jastan bastalady. Adam óltirý, densaýlyqqa aýyr jáne ortasha ziian keltirý, zorlaý, urlyq, tonaý, bopsalaý, buzaqylyq — osy qylmystar boiynsha 14 jastan asqan jasóspirimder túrmege qamalýy múmkin. 16 jasqa tolǵandar barlyq qylmys túrleri, onyń ishinde esirtki men qarýdy zańsyz saqtaý jáne ainalym úshin de jaýapqa tartylady.
Eger kámeletke tolmaǵan jasóspirim áli bul jasqa tolmaǵan bolsa, onda jaýapkershilikti onyń ata-anasy kóteredi, tipti ata-ana quqyǵynan aiyrylýy múmkin», — dep atap ótti prokýratýra ókili.
Ol sońǵy jyldardaǵy statistikany atap ótti: 500-den astam jasóspirim qylmystyq jaýapkershilikke tartylǵan, olardyń arasynda túrmege qamalǵandar da bar.
Sondai-aq, ata-analar da óz balalarynyń zańsyz áreketteri úshin ákimshilik jaýapkershilikke tartylǵan.
Sonymen qatar, oqýshylarǵa jaqynda Astanada bolǵan jasóspirimder arasyndaǵy jappai tóbeles týraly eskertildi.
«Sizder, bálkim, jasóspirimder jinalyp, jappai tóbelesýge tyrysqandary týraly estigen bolarsyzdar. Oǵan qatysýshylarmen politsiia birneshe kún boiy jumys istep jatyr. Jaýapkershilikten eshkim qutyla almaidy, bári esepke alynyp, mektepten shyǵarylyp, kámeletke tolmaǵandar jónindegi komissiiada qaralady, «erekshe kózge túskender» sottalady, ata-analary da jaýapqa tartylady», — dep atap ótti baqylaýshy organnyń ókili.
