Qamaýda otyrǵan Arman Jumageldievtiń (Dikii Arman) advokaty Viktor Krivonosov Qostanai qalasyndaǵy №76 tergeý izoliatorynda qysymǵa ushyraǵanyn málimdedi, dep habarlaidy Dalanews.kz.
Advokattyń málimetinshe, jaqynda ol Jumageldievpen kezdesýge barǵanda, izoliator qyzmetkerleri ony zańsyz áreketterge májbúrlegen. Krivonosov shalbaryn sheship, sporttyq kiimmen kirýge mindettelgen. Onyń sózinshe, bul advokattyń ar-namysy men kásibi qyzmetine qol suǵý dep baǵalanady.
“Eger olar advokattarǵa osylai qarasa, munda qamaýda otyrǵandarǵa qalai qaraitynyn elestetýdiń ózi qiyn”, – dedi ol.
Advokattyń bul shaǵymyna qatysty Qostanai oblysy boiynsha Qylmystyq-atqarý júiesi departamenti túsinikteme berdi. Vedomstvonyń málimdeýinshe, tergeý izoliatoryna kiretin barlyq kelýshige tyiym salynǵan zattardyń ótip ketýine jol bermeý úshin mindetti tekserý júrgiziledi.
“Advokattarǵa rejimdik mekemede tekserýden ótý tártibi aldyn ala túsindirildi. Qaýipsizdik sharalary aiasynda metall izdegish qural advokattardyń birinen belgi bergendikten, oǵan tolyq tekserýden ótý usynyldy”, – dep habarlady QAJ departamenti.
