Qyzylorda oblysynyń ákimi Murat Ergeshbaevtyń qatysýymen Munaishylar kúni aiasynda «Qumkól» ken ornynyń ónerkásiptik igerilýiniń 40 jyldyǵyna arnalǵan «Qumkól: Qara altyn shejiresi» atty saltanatty shara ótti, dep habarlaidy dalanews.kz.
Aimaq basshysy munai salasynyń el ekonomikasyndaǵy mańyzyn atap ótip, mamandardy kásibi merekemen quttyqtady.
«Prezidentimiz Qasym-Jomart Kemeluly: «Munai-gaz salasy – ekonomikamyzdyń tiregi, elimizdiń qarqyndy damýynyń kepili. Memleket árqashan energetika salasynyń áleýetin arttyrýǵa, jańa ken oryndaryn igerýge jáne sala jumysshylarynyń múddesin qorǵaýǵa erekshe kóńil bóledi», dep atap ótken bolatyn. Elimizdiń ekonomikalyq áleýetin arttyrýda Qyzylorda oblysyndaǵy munai kompaniialarynyń, onda eńbek etetin munaishylardyń úlesi zor», – dedi Murat Ergeshbaev.
«Qumkól» kenishin igerý týraly sheshim osydan qyryq jyl buryn qabyldanyp, ken orny óńirdegi óndiristiń ózegine ainaldy. Oblys munaily aimaqqa ainalý jolynda qalyptasý, damý kezeńderinen ótti.
Saltanatty sharada «QazMunaiGaz» UK AQ basqarma tóraǵasy Ashat Hasenov, «CNPC Central Asia» jáne «CNPC Kazakhstan» kompaniialarynyń bas direktory Ian Miniýi, «PetroQazaqstan Qumkól Resorsiz» AQ prezidenti Chen Daiý quttyqtaý sóz sóiledi.
Munai-gaz salasyn damytýǵa qosqan eleýli úlesi men óndiristik qyzmettegi joǵary jetistikteri úshin sala mamandary memlekettik jáne salalyq marapattarǵa ie boldy. Atap aitqanda, munaishylarǵa memlekettik, vedomstvolyq nagradalar men «Qumkól» ken ornynyń 40 jyldyǵyna arnalǵan mereitoilyq medal tabystaldy.
Óńirde munai kompaniialarynyń qoldaýymen áleýmettik nysandar salynyp, infraqurylymdyq jáne áleýmettik jobalar júzege asýda. «QazGermunai» kompaniiasynyń demeýshiligimen «Oqýshylar saraiy», «Saýts Oil» kompaniiasynyń qoldaýymen mýzykalyq kolledj ǵimaraty jataqhanasymen birge salyndy. Al «PetroQazaqstan Qumkól Resorsiz» AQ jyl saiyn qaiyrymdylyq sharalaryna 150 mln teńgeden astam qarjy bólip keledi.
Jańa kenishterdi anyqtaý maqsatynda shógindi basseinderdi zerdeleý qarastyrylǵan. Aral shógindi basseininde geologiialyq zertteý jumystary 2024 jyldyń jeltoqsan aiynda aiaqtalyp, shamamen 1,1 mlrd. tonna kómirsýtek qory anyqtaldy. Al, Syrdariia shógindi basseinin zertteý jalǵasýda. «SaýtsOil» kompaniiasy taqtatas munaiyn dástúrli emes tásilmen óndirý úshin daiyndyq jumystaryn bastady.
