Qulsaryda balta ustaǵan jasóspirim eki qatarlasyna shabýyl jasady. Atyraý oblysy Densaýlyq saqtaý basqarmasy Qulsary qalasyndaǵy №6 jalpy bilim beretin mektepte bolǵan oqiǵaǵa bailanysty pikir bildirdi, dep habarlaidy Dalanews.kz.
Oqiǵa saldarynan 2009, 2010 jyldary týǵan eki jasóspirim meditsinalyq tekseristen ótken.
"Zardap shekkenderge alǵashqy meditsinalyq kómek kórsetilip, olardy travmatolog dáriger qarady. Tekseris barysynda syzattar men teriasty kógergen jerler anyqtaldy", - dep jazylǵan vedomstvo habarlamasynda.
Naýqastarǵa qajet em-dom jasalyp, rentgenologiia zertteýi júrgizilgen. Dárigerler olardy ambýlatorlyq em qabyldaýǵa jibergen.
"Qazir jasóspirimderdiń ómirine qaýip joq", - dedi dárigerler.
Aita keteiik, 5 aqpanda 102 arnasyna Qulsary qalasynda 10-synyp oqýshysy qatarlastarymen janjaldan keiin olarǵa shabýyl jasap, mektep aýmaǵynan boi tasalaǵany týraly habarlama túsken.
Oqiǵa saldarynan eki oqýshy jeńil dene jaraqatyn alǵan edi.
