Nazarbaevtyń ortanshy kúieý balasy Timýr Qulybaev Ábý-Dábidiń óńsheń yǵai men syǵailar turatyn Nudra Villas aýdanynda villalar kesheniniń qurylysyn aiaqtady, – dep jazady Dalanews.kz.
«Vyhod k more» telegram arnasynyń jazýynsha han saraiyndai villalardy eks-prezidenttiń kúieý balasynyń Birikken arab ámirlikterinde tirkelgen qurylys kompaniiasy arqyly salǵan.
Ázirshe aýqymdy jobanyń quny jaiynda naqty aqparat joq. Jyljymaityn múlik salasy mamandary mundai aýqymdy jobany salý úshin keminde 11 mlrd teńge kerek ekenin alǵa tartypty.
Nudra Villas aýdanyndaǵy villalar kesheniniń qurylys jumystary 2020 jyly bastalǵan bolatyn. Ál-Saadiiat aralyndaǵy keshende ár túrli 32 villa ornalasqan.
BAÁ taraby qazaqstandyq investorǵa villalardyń qurylysyn júrgizýge 25 gektar jer telimin bólgen. Qulybaevtyń qurylys kompaniiasy salyp bitken elitaly úiler teńiz jaǵalaýyna jaqyn. Bai-manaptardyń turýyna óte qolaily. Bul úilerdi satyp alǵan baqytty jandar úiden shyǵa salyp, teńizge shomylyp, kúnge qyzdyryna alady.
Bir qyzyǵy Timýr Qulybaevtyń kompaniiasy sońǵy villany uzaq salsa kerek. Onyń ózindik syry bar.
Áńgime arasynda kesheniniń qurylysy 2020 bastalǵanyn aittyq qoi. Ol kezde Nazarbaevtyń kúieý balasynyń aq degeni alǵys, qara degeni qarǵys bolyp turǵan edi.
Keiinnen Qańtar oqiǵasy oryn alyp, qaiyn atasy da, ózi de bilikten shetettilgennen keiin Qulybaevtyń da mazasy bolmaǵany anyq. Osy aralyqta onyń Arab ámirlikterinde salynyp jatqan qurylysqa bas aýyrtatyndai murshasy bolmasa kerek.
Keiinnen Timýr Qulybaev óz-ózine kelgennen keiin villalardyń qurylys jumystary óz arnasyna túsken.
Osylaisha 2023 jyly villa keshenine tiesili aýmaq 50 gekatarǵa deiin artyp, tolyqtai qorshalady. Sonymen qatar sońǵy villanyń irgetasy quiylyp, qurylysy qarqyndy júre bastaidy.
Ábý-Dábide jyljymaityn múliktiń reestrin kez kelgen adamnyń kórýine shekteý qoiylǵan. Biraq «Vyhod k more» telegram arnasy qurylys jumystaryna aralasyp jatqan bir merdiger kompaniianyń portfoliosyn súzigiden ótkizip, biraz jaitty anyqtapty.
Portfoliodaǵy bir fotoda Nudra Villas aýdanyndaǵy villa keshenin salýǵa Steppe Infrastructure SPV Limited kompaniiasy tapsyrys bergeni taiǵa tańba basqandai anyq jazylǵan. Al portfoliodaǵy fotoǵa muqiiat qaraǵanda, fotonyń WhatsApp arqyly jiberilgenin anyqtapty. Fotonyń faily «WhatsApp-Image-2023-10-06-at-10.06.11-AM-1». Budan sýrettiń 2023 jyldyń 6 qazanynda jiberilgenin baiqaýǵa bolady.
Google Earth servisi sońǵy ret villa kesheni salynyp jatqan aýmaqty fotoaǵa 2023 jyldyń tamyz aiynda túsirgen. Onda sońǵy villanyń irgetasy quiylyp, qurylys jumystarynyń qarqyn ala bastaǵanyn kórýge bolady. Al merdiger kompaniianyń portfoliosyndaǵy fotodan qurylystyń negizig jumystary aiaqtalyp, foto 2023 jyldyń 6 qazanynda túsirilgenin baiqaýǵa bolady. Budan Timýr Qulybaevtyń Nudra Villas aýdanyndaǵy villa kesheneniń qurylysy aiaqtalǵanyn baiqaýǵa bolady.
Endigi kezekte Timýr Qulybaevtyń Steppe Infrastructure SPV Limited kompaniiasyna qanshalyqty bailanysy bar degen basty suraqqa jaýap izdep kórsek. «Vyhod k more» telegram arnasy Timýr Qulybaev ózine tiesili sheteldik kompaniialaryn quzyrly oryndarǵa tirketkende «Steppe» sózin jii qoldanatyn bolsa kerek.
Arna zertteýshileri Steppe Infrastructure SPV Limited kompaniiasynyń sońǵy benefitsiary Ispaniiada tirkelgen Flinder Data SL kompaniiasy ekenin anyqtapty. Flinder Data SL kompaniiasyna Ispaniianyń Kataloniia aimaǵyndaǵy kóptegen jyljymaityn múlikter tirkelgeni kópshilikke belgili.
Onyń arasynda sáni men saltanaty jarasqan Can Juncadella villasy da bar (fotosy joǵaryda). Buǵan deiin teńiz jaǵasyndaǵy qyratqa salynǵan Can Juncadella villasy negizgi qojaiyny eks-prezident Nursultan Ábishuly ekeni jaiyndaǵy aqparat taraǵan bolatyn.
Ábý-Dábidiń irgesinde, teńizge tiip turǵan jerdegi Nudra Villas aýdanynan villa keshenin salýǵa qomaqty qarjy kerek ekenin biz aitpasaq ta túsinikti. Óz kezeginde telegram arna Qulybaevtyń mundai villa keshenin salýǵa 24 mln dollar (10,7 mlrd teńge) jumsaýy múmkin dep óz boljamyn keltiripti.
Bul – qarapaiym halyqtyń túsine kirmeitin aqsha. Al Qulybaev úshin kezekti biznes jobalardyń biri bolýy múmkin.
Nazarbaevtyń kúieý balasy salǵan villa keshenin túp kóterip, elge ákeletin múmkindik joq. Biraq álgi villalar ystyq bálish sekildi satylyp ketkennen keiin, aqshasyn elge qaitarýǵa kúsh salýǵa bolar dep úmittenemiz.
