نازاربايەۆتىڭ ورتانشى كۇيەۋ بالاسى تيمۋر قۇلىبايەۆ ءابۋ-دابيدىڭ وڭشەڭ ىعاي مەن سىعايلار تۇراتىن Nudra Villas اۋدانىندا ۆيللالار كەشەنىنىڭ قۇرىلىسىن اياقتادى، – دەپ جازادى Dalanews.kz.
«ۆىحود ك مورە» تەلەگرام ارناسىنىڭ جازۋىنشا حان سارايىنداي ۆيللالاردى ەكس-پرەزيدەنتتىڭ كۇيەۋ بالاسىنىڭ بىرىككەن اراب امىرلىكتەرىندە تىركەلگەن قۇرىلىس كومپانياسى ارقىلى سالعان.
ازىرشە اۋقىمدى جوبانىڭ قۇنى جايىندا ناقتى اقپارات جوق. جىلجىمايتىن مۇلىك سالاسى ماماندارى مۇنداي اۋقىمدى جوبانى سالۋ ءۇشىن كەمىندە 11 ملرد تەڭگە كەرەك ەكەنىن العا تارتىپتى.
Nudra Villas اۋدانىنداعى ۆيللالار كەشەنىنىڭ قۇرىلىس جۇمىستارى 2020 جىلى باستالعان بولاتىن. ءال-سااديات ارالىنداعى كەشەندە ءار ءتۇرلى 32 ۆيللا ورنالاسقان.
ءباا تارابى قازاقستاندىق ينۆەستورعا ۆيللالاردىڭ قۇرىلىسىن جۇرگىزۋگە 25 گەكتار جەر تەلىمىن بولگەن. قۇلىبايەۆتىڭ قۇرىلىس كومپانياسى سالىپ بىتكەن ەليتالى ۇيلەر تەڭىز جاعالاۋىنا جاقىن. باي-ماناپتاردىڭ تۇرۋىنا وتە قولايلى. بۇل ۇيلەردى ساتىپ العان باقىتتى جاندار ۇيدەن شىعا سالىپ، تەڭىزگە شومىلىپ، كۇنگە قىزدىرىنا الادى.
ءبىر قىزىعى تيمۋر قۇلىبايەۆتىڭ كومپانياسى سوڭعى ۆيللانى ۇزاق سالسا كەرەك. ونىڭ وزىندىك سىرى بار.
اڭگىمە اراسىندا كەشەنىنىڭ قۇرىلىسى 2020 باستالعانىن ايتتىق قوي. ول كەزدە نازاربايەۆتىڭ كۇيەۋ بالاسىنىڭ اق دەگەنى العىس، قارا دەگەنى قارعىس بولىپ تۇرعان ەدى.
كەيىننەن قاڭتار وقيعاسى ورىن الىپ، قايىن اتاسى دا، ءوزى دە بيلىكتەن شەتەتتىلگەننەن كەيىن قۇلىبايەۆتىڭ دا مازاسى بولماعانى انىق. وسى ارالىقتا ونىڭ اراب امىرلىكتەرىندە سالىنىپ جاتقان قۇرىلىسقا باس اۋىرتاتىنداي مۇرشاسى بولماسا كەرەك.
كەيىننەن تيمۋر قۇلىبايەۆ وز-وزىنە كەلگەننەن كەيىن ۆيللالاردىڭ قۇرىلىس جۇمىستارى ءوز ارناسىنا تۇسكەن.
وسىلايشا 2023 جىلى ۆيللا كەشەنىنە تيەسىلى اۋماق 50 گەكاتارعا دەيىن ارتىپ، تولىقتاي قورشالادى. سونىمەن قاتار سوڭعى ۆيللانىڭ ىرگەتاسى قۇيىلىپ، قۇرىلىسى قارقىندى جۇرە باستايدى.
ابۋ-دابيدە جىلجىمايتىن مۇلىكتىڭ رەەسترىن كەز كەلگەن ادامنىڭ كورۋىنە شەكتەۋ قويىلعان. ءبىراق «ۆىحود ك مورە» تەلەگرام ارناسى قۇرىلىس جۇمىستارىنا ارالاسىپ جاتقان ءبىر مەردىگەر كومپانيانىڭ پورتفوليوسىن سۇزىگىدەن وتكىزىپ، ءبىراز جايتتى انىقتاپتى.
پورتفوليوداعى ءبىر فوتودا Nudra Villas اۋدانىنداعى ۆيللا كەشەنىن سالۋعا Steppe Infrastructure SPV Limited كومپانياسى تاپسىرىس بەرگەنى تايعا تاڭبا باسقانداي انىق جازىلعان. ال پورتفوليوداعى فوتوعا مۇقيات قاراعاندا، فوتونىڭ WhatsApp ارقىلى جىبەرىلگەنىن انىقتاپتى. فوتونىڭ فايلى «WhatsApp-Image-2023-10-06-at-10.06.11-AM-1». بۇدان سۋرەتتىڭ 2023 جىلدىڭ 6 قازانىندا جىبەرىلگەنىن بايقاۋعا بولادى.
Google Earth سەرۆيسى سوڭعى رەت ۆيللا كەشەنى سالىنىپ جاتقان اۋماقتى فوتواعا 2023 جىلدىڭ تامىز ايىندا تۇسىرگەن. وندا سوڭعى ۆيللانىڭ ىرگەتاسى قۇيىلىپ، قۇرىلىس جۇمىستارىنىڭ قارقىن الا باستاعانىن كورۋگە بولادى. ال مەردىگەر كومپانيانىڭ پورتفوليوسىنداعى فوتودان قۇرىلىستىڭ نەگىزىگ جۇمىستارى اياقتالىپ، فوتو 2023 جىلدىڭ 6 قازانىندا تۇسىرىلگەنىن بايقاۋعا بولادى. بۇدان تيمۋر قۇلىبايەۆتىڭ Nudra Villas اۋدانىنداعى ۆيللا كەشەنەنىڭ قۇرىلىسى اياقتالعانىن بايقاۋعا بولادى.
ەندىگى كەزەكتە تيمۋر قۇلىبايەۆتىڭ Steppe Infrastructure SPV Limited كومپانياسىنا قانشالىقتى بايلانىسى بار دەگەن باستى سۇراققا جاۋاپ ىزدەپ كورسەك. «ۆىحود ك مورە» تەلەگرام ارناسى تيمۋر قۇلىبايەۆ وزىنە تيەسىلى شەتەلدىك كومپانيالارىن قۇزىرلى ورىندارعا تىركەتكەندە «Steppe» ءسوزىن ءجيى قولداناتىن بولسا كەرەك.
ارنا زەرتتەۋشىلەرى Steppe Infrastructure SPV Limited كومپانياسىنىڭ سوڭعى بەنەفيسيارى يسپانيادا تىركەلگەن Flinder Data SL كومپانياسى ەكەنىن انىقتاپتى. Flinder Data SL كومپانياسىنا يسپانيانىڭ كاتالونيا ايماعىنداعى كوپتەگەن جىلجىمايتىن مۇلىكتەر تىركەلگەنى كوپشىلىككە بەلگىلى.
ونىڭ اراسىندا ءسانى مەن سالتاناتى جاراسقان Can Juncadella ۆيللاسى دا بار (فوتوسى جوعارىدا). بۇعان دەيىن تەڭىز جاعاسىنداعى قىراتقا سالىنعان Can Juncadella ۆيللاسى نەگىزگى قوجايىنى ەكس-پرەزيدەنت نۇرسۇلتان ءابىش ۇلى ەكەنى جايىنداعى اقپارات تاراعان بولاتىن.
ءابۋ-دابيدىڭ ىرگەسىندە، تەڭىزگە ءتيىپ تۇرعان جەردەگى Nudra Villas اۋدانىنان ۆيللا كەشەنىن سالۋعا قوماقتى قارجى كەرەك ەكەنىن ءبىز ايتپاساق تا تۇسىنىكتى. ءوز كەزەگىندە تەلەگرام ارنا قۇلىبايەۆتىڭ مۇنداي ۆيللا كەشەنىن سالۋعا 24 ملن دوللار (10،7 ملرد تەڭگە) جۇمساۋى مۇمكىن دەپ ءوز بولجامىن كەلتىرىپتى.
بۇل – قاراپايىم حالىقتىڭ تۇسىنە كىرمەيتىن اقشا. ال قۇلىبايەۆ ءۇشىن كەزەكتى بيزنەس جوبالاردىڭ ءبىرى بولۋى مۇمكىن.
نازاربايەۆتىڭ كۇيەۋ بالاسى سالعان ۆيللا كەشەنىن ءتۇپ كوتەرىپ، ەلگە اكەلەتىن مۇمكىندىك جوق. ءبىراق الگى ۆيللالار ىستىق ءبالىش سەكىلدى ساتىلىپ كەتكەننەن كەيىن، اقشاسىن ەلگە قايتارۋعا كۇش سالۋعا بولار دەپ ۇمىتتەنەمىز.
