Jetisý oblysynda qulaǵan gidroushaqtyń bólshekteri memlekettik saýdaǵa qoiyldy. Lottyń bastapqy baǵasy – 3,1 mln teńge. Saýda 12 qarashada ótedi. Bul týraly «Za nami vyehali» Telegram-arnasy habarlady, dep habarlaidy dalanews.kz.
Jariialanǵan sýretterden ushaqtyń apatqa ushyraǵany baiqalady. Qaiyq tárizdi korpýsynyń tumsyǵy maiysyp, qozǵaltqyshy bólek jatyr. Korpýsta «870» degen nómir kórinedi. Telegram-arnasynyń boljamynsha, satylymǵa qoiylǵan bólshekter 2024 jylǵy 25 shildede Alakól mańyndaǵy Aqshi aýylynda qulaǵan gidroushaqqa tiesili bolýy múmkin. Sol kezde apattan aýyr jaraqat alǵan eki týristi qutqarýshylar alyp shyqqan.
Keiin ushaq iesiniń týristerdi aqyly túrde qydyrtqany anyqtalǵan. Sondai-aq áýe apparaty memlekettik tirkeýge qoiylmaǵany, al ony basqarǵan adamnyń ushqysh kýáligi bolmaǵany belgili boldy. Oqiǵaǵa bailanysty taraptar ózara kelisimge kelip, qylmystyq is toqtatylǵan. Ushaq iesine 55 380 teńge aiyppul salynǵan. Al SKYPPER 912 áýe apparaty memleket menshigine berilgen.
Buǵan deiin ushaqty satýǵa arnalǵan saýda qazan aiynda eki ret ótkizilmegen. Sebebi satyp alýshylar tabylmaǵan. Endi onyń bólshekteri 3,1 mln teńge bastapqy baǵamen qaita satylymǵa shyǵarylyp otyr.
