Bul týraly Sáýle Ábedinova jelidegi paraqshasynda jazdy.
Biz meshitke barǵanda saǵat keshki 6-dan ótip qalypty. “Quran oqityn bólme” degen esik tars jabyq. Syrtynda “qajet bolǵan jaǵdaida, myna nómirge habarlasyńyzdar” dep telefon nómiri jazylǵan. Habarlastyq. Nietimizdi aittyq. Ar jaqtaǵy daýys: “Biz 6-ǵa deiin isteimiz… kezekshi imamdy izdep kórińizder…” deidi…
“Qajet bolǵan jaǵdaida” habarlastyq, paida bolmady. Sonda “qajet bolǵan jaǵdai” degendi qalai túsinýge bolady? Tek janaza shyǵarǵylary kep turatyn “tabytqaǵarlar” ma eken degen oi keledi eriksiz.
Baiaǵyda, umytpasam osydan eki jyl buryn túngi saǵat 1-2-niń kezinde inim: “Qatty qysylyp turmyn, maǵan molda kerek, meni meshitke aparshy…” dep.., sodan men ony kóligime otyrǵyzyp alyp, búkil Almatynyń meshitterin sharlaǵanymyz týraly osy FB paraqshamda jazǵan edim… Barlyq meshittiń qaqpasy “ólmeseń, ómirem qap!” degendei, tars jabyq turǵan. Inim qalshyldap, dirildep, qatty qysylǵan edi…Tipti, qaqpadan syǵalaǵan pende bolmady…
Sonda deimin-aý, túnde kelseń – tars jabyq, keshke kelseń – tars jabyq… Qudaidyń úii kúndiz-túni ashyq turýy tiis emes pe degen qisyndy suraq týyndaidy.
Ásirese, beisenbi, juma kúnderi, tym bolmasa, quptan namazyna deiin ashyq tursa bolmai ma? Osy kúnderi quran baǵyshtaityn qazaqpyz…
Onyń ústine, jumys kúnin “18.00-ge deiin” dep bekitip tastaityndai, bular memlekettik qyzmetkerler emes qoi. Solai eken, esiginiń syrtyna telefon nómirin emes, jumys kestesin jazyp, ilip qoisyn, halyq qai ýaqytta kelý kerektigin bile júretin bolady.
Adam pende bolǵandyqtan táýlik boiy Allaǵa táýeldi, qudaidyń úiine táýeldilik sát saiyn týyndaýy múmkin… Tipti, meshit qyzmetkerleriniń jumys kúni aiaqtaldy dep, Ázireiil de jumys ýaqytyn 18.00-den keiin toqtata turmaidy…
Dini qyzmetkerler óz mindetterin durys atqaratyny ras bolsa, tym bolmasa, quran oqityn bólmesinde táýlik boiy isteitin turaqty bir-eki imamdy ustasyn. Olai ete almaityn bolsa, nesine Qudaidyń úii bolyp, nesine “Ortalyq meshit” atanyp júr???
Jastar ózge dinge ketip jatyr dep renjimiz… Ózge din ǵibadathanalarynda olardyń “moldasy” tek namaz, quran, ýaǵyzben shektelip qoimaidy, adamnyń ishki jandúniesin túsinýge tyrysyp, jelep-jebeýshi perishteniń qyzmetin atqarmasa da, jan kúizelisin tyńdap, kóńilin jubatyp, aqyl-keńesterin aitady, jol kórsetedi…
Imam aǵzam myrzalar, sizderge de biraz kommýnikabelnost, kreativnost kerek dep oilamaisyzdar ma?
