بۇل تۋرالى ساۋلە ابەدينوۆا جەلىدەگى پاراقشاسىندا جازدى.
ءبىز مەشىتكە بارعاندا ساعات كەشكى 6-دان ءوتىپ قالىپتى. “قۇران وقيتىن بولمە” دەگەن ەسىك تارس جابىق. سىرتىندا “قاجەت بولعان جاعدايدا، مىنا نومىرگە حابارلاسىڭىزدار” دەپ تەلەفون ءنومىرى جازىلعان. حابارلاستىق. نيەتىمىزدى ايتتىق. ار جاقتاعى داۋىس: “ءبىز 6-عا دەيىن ىستەيمىز… كەزەكشى يمامدى ىزدەپ كورىڭىزدەر…” دەيدى…
“قاجەت بولعان جاعدايدا” حابارلاستىق، پايدا بولمادى. سوندا “قاجەت بولعان جاعداي” دەگەندى قالاي تۇسىنۋگە بولادى؟ تەك جانازا شىعارعىلارى كەپ تۇراتىن “تابىتقاعارلار” ما ەكەن دەگەن وي كەلەدى ەرىكسىز.
باياعىدا، ۇمىتپاسام وسىدان ەكى جىل بۇرىن تۇنگى ساعات 1-2ء-نىڭ كەزىندە ءىنىم: “قاتتى قىسىلىپ تۇرمىن، ماعان مولدا كەرەك، مەنى مەشىتكە اپارشى…” دەپ..، سودان مەن ونى كولىگىمە وتىرعىزىپ الىپ، بۇكىل الماتىنىڭ مەشىتتەرىن شارلاعانىمىز تۋرالى وسى فب پاراقشامدا جازعان ەدىم… بارلىق مەشىتتىڭ قاقپاسى “ولمەسەڭ، ومىرەم قاپ!” دەگەندەي، تارس جابىق تۇرعان. ءىنىم قالشىلداپ، دىرىلدەپ، قاتتى قىسىلعان ەدى…ءتىپتى، قاقپادان سىعالاعان پەندە بولمادى…
سوندا دەيمىن-اۋ، تۇندە كەلسەڭ – تارس جابىق، كەشكە كەلسەڭ – تارس جابىق… قۇدايدىڭ ءۇيى كۇندىز-تۇنى اشىق تۇرۋى ءتيىس ەمەس پە دەگەن قيسىندى سۇراق تۋىندايدى.
اسىرەسە، بەيسەنبى، جۇما كۇندەرى، تىم بولماسا، قۇپتان نامازىنا دەيىن اشىق تۇرسا بولماي ما؟ وسى كۇندەرى قۇران باعىشتايتىن قازاقپىز…
ونىڭ ۇستىنە، جۇمىس كۇنىن “18.00-گە دەيىن” دەپ بەكىتىپ تاستايتىنداي، بۇلار مەملەكەتتىك قىزمەتكەرلەر ەمەس قوي. سولاي ەكەن، ەسىگىنىڭ سىرتىنا تەلەفون ءنومىرىن ەمەس، جۇمىس كەستەسىن جازىپ، ءىلىپ قويسىن، حالىق قاي ۋاقىتتا كەلۋ كەرەكتىگىن بىلە جۇرەتىن بولادى.
ادام پەندە بولعاندىقتان تاۋلىك بويى اللاعا تاۋەلدى، قۇدايدىڭ ۇيىنە تاۋەلدىلىك ءسات سايىن تۋىنداۋى مۇمكىن… ءتىپتى، مەشىت قىزمەتكەرلەرىنىڭ جۇمىس كۇنى اياقتالدى دەپ، ازىرەيىل دە جۇمىس ۋاقىتىن 18.00-دەن كەيىن توقتاتا تۇرمايدى…
ءدىني قىزمەتكەرلەر ءوز مىندەتتەرىن دۇرىس اتقاراتىنى راس بولسا، تىم بولماسا، قۇران وقيتىن بولمەسىندە تاۋلىك بويى ىستەيتىن تۇراقتى بىر-ەكى يمامدى ۇستاسىن. ولاي ەتە المايتىن بولسا، نەسىنە قۇدايدىڭ ءۇيى بولىپ، نەسىنە “ورتالىق مەشىت” اتانىپ ءجۇر؟؟؟
جاستار وزگە دىنگە كەتىپ جاتىر دەپ رەنجيمىز… وزگە ءدىن عيباداتحانالارىندا ولاردىڭ “مولداسى” تەك ناماز، قۇران، ۋاعىزبەن شەكتەلىپ قويمايدى، ادامنىڭ ىشكى جاندۇنيەسىن تۇسىنۋگە تىرىسىپ، جەلەپ-جەبەۋشى پەرىشتەنىڭ قىزمەتىن اتقارماسا دا، جان كۇيزەلىسىن تىڭداپ، كوڭىلىن جۇباتىپ، اقىل-كەڭەستەرىن ايتادى، جول كورسەتەدى…
يمام اعزام مىرزالار، سىزدەرگە دە ءبىراز كوممۋنيكابەلنوست، كرەاتيۆنوست كەرەك دەپ ويلامايسىزدار ما؟
