Qazaqstanda shaǵyn jáne orta biznes ókilderine qatysty salyqtyq bereshekter boiynsha jeńildik sharalary qolǵa alynbaq. Úkimet "taza paraq" qaǵidatyn iske qosyp, 2026 jylǵy 1 qańtarǵa deiin qalyptasqan ósimpuldar men aiyppuldardy esepten shyǵarýdy josparlap otyr. Ol úshin kásipkerler negizgi salyq qaryzyn 1 sáýirge deiin óteýi tiis, dep habarlaidy Dalanews.kz.
Bul sheshim salyqtyq ákimshilendirýdi qaita qaraý aiasynda qabyldanyp, biznestiń qarjylyq júktemesin tómendetýge baǵyttalǵan. Tiisti erejeler qańtar aiynda qoǵamdyq talqylaýǵa usynyldy, al olardyń aqpan aiynyń basynda kúshine enýi kútilip otyr.
Sonymen qatar orta jáne shaǵyn bizneske qatysty baqylaý men tekserý talaptary jeńildetiledi. Atap aitqanda, 2026 jylǵa deiingi salyqtyq kezeńder úshin tapsyrylǵan eseptilik 2025 jylǵy 17 jeltoqsanǵa deiin berilip, keiin ózgertilmegen bolsa, oǵan qatysty kameraldyq baqylaý júrgizilmeidi.
Ótken jyldar boiynsha salyqtyq tekserýler de jalpy alǵanda toqtatylady. Mundai tekserýler tek qylmystyq ister, prokýratýranyń talaptary, qarsy tekserýler nemese salyq tóleýshiniń óz ótinishi bolǵan jaǵdaida ǵana júrgiziledi.
Budan bólek, 2026 jylǵy 1 qańtarǵa deiin jasalǵan mámileler men tirkeýlerdi jaramsyz dep taný jónindegi sot talaptaryn qoiý tájiribesi toqtatylady, eger olar quqyq qorǵaý organdarynyń materialdaryna bailanysty bolmasa.
2026 jyldan bastap QQS boiynsha ýaqytynda tirkelmegeni, sol kezeńdegi ainalymdar men ótken jyldar úshin eseptilik tapsyrmaǵany úshin ákimshilik is qozǵalmaidy.
Sonymen birge Qarjy ministrligi 2026 jyl boiy mikro jáne shaǵyn bizneske ósimpuldar men aiyppuldardy múlde eseptemeý múmkindigin qarastyryp jatyr.
