Belgili otbasylyq psiholog Ǵaliiash Mahashova qazir kúlli qazaqstandyqtardy alańdatyp otyrǵan Bishimbaev isine qatysty pikir bildirdi. Sarapshy eks-ministr men onyń ata-anasynyń psihologiialyq portretin taldap berdi, - dep habarlaidy Dalanews.kz.
Psiholog Bishimbaevtyń ata-anasynyń keiingi suhbatynan keiin qandai oi túigenin áńgimeledi. Onyń sózinshe, Bishimbaevtar marqum Núkenovany jamandaý arqyly ońbai qatelesti.
"Bishimbaevtyń jaǵdaiyn aitatyn bolsaq, Natalia Greistiń Bishimbaevtyń ata-anasynan alǵan suhbatynda bastapqy kezde mende de Bishimbaevtyń ata-anasyna degen aianysh boldy. "Bizdiń basymyzǵa kelgendi basqa bermesin" dep aityp otyrǵan sózderinde sondai aianysh sezimi boldy, biraq meniń aianyshym olar Saltanatty jarysyp jamandai bastaǵan kezde toqtady. Sol jerde psihologiialyq kartina ashyla bastady. Birinshi myna nársege mán bereiik, anasyna sózine kelsek, "bizdiń balamyz ondai jasaýy múmkin emes, ol meiirimdi jáne qamqor" dep aitty. Serial bolyp jatqan sottaǵy jaǵdaidy qaraityn bolsaq, sol jerde shynymen de Saltanattyń kómekshisi kelip, (Bishimbaev - esk.) "anasyna syilyq alatyn, gúl alatyn" degen siiaqty aityp jatyr. Sol jerden Qýandyq Bishimbaevtyń óz anasyna degen qamqorlyǵyn baiqaýǵa bolady. Anasy ótirik aityp otyrǵan joq.
Biraq anasy qamqor jáne meiirimdi degendi jeke ózimen qarym-qatynasta aityp otyr. Biraq ol balasy basqalarmen qarym-qatynasta qandai - ony anyq tanyp otyrǵan joq nemese tanyǵysy kelmei otyr. Bishimbaevtyń áke-sheshesi (boljammen - esk.) óziniń balasynan joba jasaǵan bolýy múmkin. Qandai qylyp kórgisi keldi? Minsiz qylyp kórgisi keldi. "Bizdiń tegimizge sai bolatyn, osyndai bala bolýyń kerek" (degen - esk.). Menińshe, "bolýyń kerek" degen talaptar kóp qoiylǵan siiaqty.
Qýandyq Bishimbaevtyń óziniń bergen suhbatynda "oqýdan bas almaǵanmyn" degen sekildi aitty. Balany únemi qandai da bir talaptarmen qysa beretin bolsa, ishki qysym jinalyp, bir kúni syrtqa atylady. Ol ata-anasynyń kózi kórgisi keletindei jobaǵa ainaldy ma, sol jobamen ministrlikke deiin kóterildi me?! Biraq ol óziniń kómegimen emes qoi. Múmkin ata-anasynyń qoldaýymen kóterilgen shyǵar. Ádette bala bireýdiń qoldaýymen joǵary kóteriletin bolsa, qulaǵan kezde ońbai qulaidy. Qaita kóterilýi qiyn bolady", - dedi sarapshy Bilgen Durys arnasyna bergen cuhbatynda.
Ǵaliiash Mahashova Qýandyq Bishimbaev keisinen qandai psihologiialyq jai-kúidi baiqaýǵa bolatynyn aitty.
"Qýandyq Bishimbaevtyń oqiǵasyn esimizge túsiretin bolsaq, buǵan deiin onyń da ómirinde kóterilgen jáne ońbai qulaǵan sáti boldy jáne ol ózin qaitadan taba almai qalǵan. Sol ýaqyttary ata-anasy (balasynyń - esk.) kúizeliske shaldyqqanyn kórip otyrdy ǵoi. Biraq nartsissizm degen dúnie bar. Ol ata-anasyna da tán bolýy múmkin. Ádette nartsisster qandai bolady? Kórgisi kelgendi ǵana kóredi, estigisi kelgendi ǵana estidi, qabyldaǵysy kelgendi ǵana qabyldaidy. Qýandyq Bishimbaevtyń nartsiszmi kózge kórinip tur. Soqyr emes adamǵa kórinip tur. Ol qaidan sondai bolyp tur desek, ata-anasynyń suhbatyn kórip otyrmyz, qandai otbasynan shyqqan?! Ata-anasy da solai bolyp otyr. Ózderi qabyldaǵysy kelgen nárseni qabyldap otyr. Ózderi kórgisi kelgen nárseni kórip otyr.
Suhbat bergen ýaqytta Saltanatty jamandai bastady. Ekeýi jarysyp aityp otyrdy. Bizde qazaqta "ólgen adam týraly ne jaqsy ait nemese múlde aitpa" degen sóz bar ǵoi. Bul jerde ol sóz umyt qaldy. Halyqtyń kózqarasyn ózgertemiz, shyndyq aitamyz degen oi bolǵan shyǵar. Biraq myna nárseni umytpaý kerek: tiran, abiýzer, psihopattar qandai da bir qiianatty jábirlenýshisine jasap jatqan kezde eshqashan "men kinálimin, men qatelesip jatyrmyn, men jamanmyn, sondyqtan seni uryp jatyrmyn" demeidi ǵoi. Birinshi ózin aqtap alý úshin jábirlenýshiden qatelik izdeidi. Qatelikti ózinshe tabady. Sol arqyly ony jazalaidy. Jazalap bolǵannan keiin de ony kináli etedi", - dedi ol Bilgen Durys arnasyna bergen cuhbatynda.
Sonymen qatar, sarapshy Bishimbaevqa ata-anasynyń qandai áseri bolǵanyn aitty.
"Kez kelgen eresek jasaǵan qateligine tolyq ata-anasy kináli dep aitpaimyz. Biraq bastapqy qandai da bir sebebi, jaýapkershiligi bar", - dedi psiholog.
Aita keteiik, biraz ýaqyt buryn eks-ministr Qýandyq Bishimbaevtyń ata-anasy reseilik bloger Natalia Greiske suhbat berdi.
Bishimbaevtyń anasy Álmira Bishimbaeva ulyn "ana retinde qolynan kelgenshe qorǵap júrgenin" aityp, kózine jas aldy.
"Árine, bul - óte aýyr tragediia. Saltanatty ata-anasyn túsinemin. Úiimizde úlken tragediia. Áleýmettik jelide negativ material kóp. Biraq jaqsy adamdar da kóp. Jaǵalaýda júrgen kezimde shamamen 40 jastaǵy áiel kelip, "apai, siz Qýandyq Bishimbaevtyń anasysyz ǵoi? Bekem bolyńyz, biz sizdi túsinemiz, sizdi qoldaimyz" dedi.
Mundai jaǵdai kez kelgen adamnyń basynan ótýi múmkin. Biraq mundai nárseni eshkimge tilemeimin. Ulymdy óte qatty jaqsy kóremin, ulymyzben maqtanamyz. Biraq osyndai jaǵdai bolyp qaldy. Nege bulai bolǵanyn ákesi ekeýimiz de túsine almadyq. Ol qatal adam bolǵan emes. Bala kúninen ózine jaýapkershilikti ala biletin adam bolǵan. Únemi bizge qamqor bolatyn. Úsh jyl buryn ákesi qatty aýyryp qalǵan kezde dáriger taýyp, emdetti. Únemi bizge alańdap júredi", - deidi Álmira Bishimbaeva.
Al Bishimbaevtyń ákesi marqum Núkenova týraly sóz qozǵady.
"Bastapqyda ekeýi qosylǵan kezde, árine, qýandyq. Sebebi ulymyz baqyttan basy ainalyp júrdi. Ol jaqsy kóretini baiqaldy. Biraq ýaqyt óte kele ol qateleskenin bildik. Qazaqta "jaqsy áiel kúieýin tórge súireidi, jaman áiel jaqsy erkektiń basyn kórge súireidi" degen túsinik bar. Olar bir-birin jaqsy kórgenimen bir-birin jaqsy tanymai jatyp úilendi", - deidi Ýálihan Bishimbaev.
