بەلگىلى وتباسىلىق پسيحولوگ عالياش ماحاشوۆا ءقازىر كۇللى قازاقستاندىقتاردى الاڭداتىپ وتىرعان بيشىمبايەۆ ىسىنە قاتىستى پىكىر ءبىلدىردى. ساراپشى ەكس-مينيستر مەن ونىڭ اتا-اناسىنىڭ پسيحولوگيالىق پورترەتىن تالداپ بەردى، - دەپ حابارلايدى Dalanews.kz.
پسيحولوگ بيشىمبايەۆتىڭ اتا-اناسىنىڭ كەيىنگى سۇحباتىنان كەيىن قانداي وي تۇيگەنىن اڭگىمەلەدى. ونىڭ سوزىنشە، بيشىمبايەۆتار مارقۇم نۇكەنوۆانى جامانداۋ ارقىلى وڭباي قاتەلەستى.
"بيشىمبايەۆتىڭ جاعدايىن ايتاتىن بولساق، ناتاليا گرەيستىڭ بيشىمبايەۆتىڭ اتا-اناسىنان العان سۇحباتىندا باستاپقى كەزدە مەندە دە بيشىمبايەۆتىڭ اتا-اناسىنا دەگەن ايانىش بولدى. "ءبىزدىڭ باسىمىزعا كەلگەندى باسقا بەرمەسىن" دەپ ايتىپ وتىرعان سوزدەرىندە سونداي ايانىش سەزىمى بولدى، ءبىراق مەنىڭ ايانىشىم ولار سالتاناتتى جارىسىپ جامانداي باستاعان كەزدە توقتادى. سول جەردە پسيحولوگيالىق كارتينا اشىلا باستادى. ءبىرىنشى مىنا نارسەگە ءمان بەرەيىك، اناسىنا سوزىنە كەلسەك، "ءبىزدىڭ بالامىز ونداي جاساۋى مۇمكىن ەمەس، ول مەيىرىمدى جانە قامقور" دەپ ايتتى. سەريال بولىپ جاتقان سوتتاعى جاعدايدى قارايتىن بولساق، سول جەردە شىنىمەن دە سالتاناتتىڭ كومەكشىسى كەلىپ، (بيشىمبايەۆ - ەسك.) "اناسىنا سىيلىق الاتىن، گۇل الاتىن" دەگەن سياقتى ايتىپ جاتىر. سول جەردەن قۋاندىق بيشىمبايەۆتىڭ ءوز اناسىنا دەگەن قامقورلىعىن بايقاۋعا بولادى. اناسى وتىرىك ايتىپ وتىرعان جوق.
ءبىراق اناسى قامقور جانە مەيىرىمدى دەگەندى جەكە وزىمەن قارىم-قاتىناستا ايتىپ وتىر. ءبىراق ول بالاسى باسقالارمەن قارىم-قاتىناستا قانداي - ونى انىق تانىپ وتىرعان جوق نەمەسە تانىعىسى كەلمەي وتىر. بيشىمبايەۆتىڭ اكە-شەشەسى (بولجاممەن - ەسك.) ءوزىنىڭ بالاسىنان جوبا جاساعان بولۋى مۇمكىن. قانداي قىلىپ كورگىسى كەلدى؟ ءمىنسىز قىلىپ كورگىسى كەلدى. "ءبىزدىڭ تەگىمىزگە ساي بولاتىن، وسىنداي بالا بولۋىڭ كەرەك" (دەگەن - ەسك.). مەنىڭشە، "بولۋىڭ كەرەك" دەگەن تالاپتار كوپ قويىلعان سياقتى.
قۋاندىق بيشىمبايەۆتىڭ ءوزىنىڭ بەرگەن سۇحباتىندا "وقۋدان باس الماعانمىن" دەگەن سەكىلدى ايتتى. بالانى ۇنەمى قانداي دا ءبىر تالاپتارمەن قىسا بەرەتىن بولسا، ىشكى قىسىم جينالىپ، ءبىر كۇنى سىرتقا اتىلادى. ول اتا-اناسىنىڭ كوزى كورگىسى كەلەتىندەي جوباعا اينالدى ما، سول جوبامەن مينيسترلىككە دەيىن كوتەرىلدى مە؟! ءبىراق ول ءوزىنىڭ كومەگىمەن ەمەس قوي. مۇمكىن اتا-اناسىنىڭ قولداۋىمەن كوتەرىلگەن شىعار. ادەتتە بالا بىرەۋدىڭ قولداۋىمەن جوعارى كوتەرىلەتىن بولسا، قۇلاعان كەزدە وڭباي قۇلايدى. قايتا كوتەرىلۋى قيىن بولادى"، - دەدى ساراپشى Bilgen Durys ارناسىنا بەرگەن cۇحباتىندا.
عالياش ماحاشوۆا قۋاندىق بيشىمبايەۆ كەيسىنەن قانداي پسيحولوگيالىق جاي-كۇيدى بايقاۋعا بولاتىنىن ايتتى.
"قۋاندىق بيشىمبايەۆتىڭ وقيعاسىن ەسىمىزگە تۇسىرەتىن بولساق، بۇعان دەيىن ونىڭ دا ومىرىندە كوتەرىلگەن جانە وڭباي قۇلاعان ءساتى بولدى جانە ول ءوزىن قايتادان تابا الماي قالعان. سول ۋاقىتتارى اتا-اناسى (بالاسىنىڭ - ەسك.) كۇيزەلىسكە شالدىققانىن كورىپ وتىردى عوي. ءبىراق نارسيسسيزم دەگەن دۇنيە بار. ول اتا-اناسىنا دا ءتان بولۋى مۇمكىن. ادەتتە نارسيسستەر قانداي بولادى؟ كورگىسى كەلگەندى عانا كورەدى، ەستىگىسى كەلگەندى عانا ەستيدى، قابىلداعىسى كەلگەندى عانا قابىلدايدى. قۋاندىق بيشىمبايەۆتىڭ ءنارسيسزمى كوزگە كورىنىپ تۇر. سوقىر ەمەس ادامعا كورىنىپ تۇر. ول قايدان سونداي بولىپ تۇر دەسەك، اتا-اناسىنىڭ سۇحباتىن كورىپ وتىرمىز، قانداي وتباسىنان شىققان؟! اتا-اناسى دا سولاي بولىپ وتىر. وزدەرى قابىلداعىسى كەلگەن نارسەنى قابىلداپ وتىر. وزدەرى كورگىسى كەلگەن نارسەنى كورىپ وتىر.
سۇحبات بەرگەن ۋاقىتتا سالتاناتتى جامانداي باستادى. ەكەۋى جارىسىپ ايتىپ وتىردى. بىزدە قازاقتا "ولگەن ادام تۋرالى نە جاقسى ايت نەمەسە مۇلدە ايتپا" دەگەن ءسوز بار عوي. بۇل جەردە ول ءسوز ۇمىت قالدى. حالىقتىڭ كوزقاراسىن وزگەرتەمىز، شىندىق ايتامىز دەگەن وي بولعان شىعار. ءبىراق مىنا نارسەنى ۇمىتپاۋ كەرەك: تيران، ابيۋزەر، پسيحوپاتتار قانداي دا ءبىر قياناتتى جابىرلەنۋشىسىنە جاساپ جاتقان كەزدە ەشقاشان "مەن كىنالىمىن، مەن قاتەلەسىپ جاتىرمىن، مەن جامانمىن، سوندىقتان سەنى ۇرىپ جاتىرمىن" دەمەيدى عوي. ءبىرىنشى ءوزىن اقتاپ الۋ ءۇشىن جابىرلەنۋشىدەن قاتەلىك ىزدەيدى. قاتەلىكتى وزىنشە تابادى. سول ارقىلى ونى جازالايدى. جازالاپ بولعاننان كەيىن دە ونى كىنالى ەتەدى"، - دەدى ول Bilgen Durys ارناسىنا بەرگەن cۇحباتىندا.
سونىمەن قاتار، ساراپشى بيشىمبايەۆقا اتا-اناسىنىڭ قانداي اسەرى بولعانىن ايتتى.
"كەز كەلگەن ەرەسەك جاساعان قاتەلىگىنە تولىق اتا-اناسى كىنالى دەپ ايتپايمىز. ءبىراق باستاپقى قانداي دا ءبىر سەبەبى، جاۋاپكەرشىلىگى بار"، - دەدى پسيحولوگ.
ايتا كەتەيىك، ءبىراز ۋاقىت بۇرىن ەكس-مينيستر قۋاندىق بيشىمبايەۆتىڭ اتا-اناسى رەسەيلىك بلوگەر ناتاليا گرەيسكە سۇحبات بەردى.
بيشىمبايەۆتىڭ اناسى ءالميرا بيشىمبايەۆا ۇلىن "انا رەتىندە قولىنان كەلگەنشە قورعاپ جۇرگەنىن" ايتىپ، كوزىنە جاس الدى.
"ارينە، بۇل - وتە اۋىر تراگەديا. سالتاناتتى اتا-اناسىن تۇسىنەمىن. ۇيىمىزدە ۇلكەن تراگەديا. الەۋمەتتىك جەلىدە نەگاتيۆ ماتەريال كوپ. ءبىراق جاقسى ادامدار دا كوپ. جاعالاۋدا جۇرگەن كەزىمدە شامامەن 40 جاستاعى ايەل كەلىپ، "اپاي، ءسىز قۋاندىق بيشىمبايەۆتىڭ اناسىسىز عوي؟ بەكەم بولىڭىز، ءبىز ءسىزدى تۇسىنەمىز، ءسىزدى قولدايمىز" دەدى.
مۇنداي جاعداي كەز كەلگەن ادامنىڭ باسىنان ءوتۋى مۇمكىن. ءبىراق مۇنداي نارسەنى ەشكىمگە تىلەمەيمىن. ۇلىمدى وتە قاتتى جاقسى كورەمىن، ۇلىمىزبەن ماقتانامىز. ءبىراق وسىنداي جاعداي بولىپ قالدى. نەگە بۇلاي بولعانىن اكەسى ەكەۋىمىز دە تۇسىنە المادىق. ول قاتال ادام بولعان ەمەس. بالا كۇنىنەن وزىنە جاۋاپكەرشىلىكتى الا بىلەتىن ادام بولعان. ۇنەمى بىزگە قامقور بولاتىن. ءۇش جىل بۇرىن اكەسى قاتتى اۋىرىپ قالعان كەزدە دارىگەر تاۋىپ، ەمدەتتى. ۇنەمى بىزگە الاڭداپ جۇرەدى"، - دەيدى ءالميرا بيشىمبايەۆا.
ال بيشىمبايەۆتىڭ اكەسى مارقۇم نۇكەنوۆا تۋرالى ءسوز قوزعادى.
"باستاپقىدا ەكەۋى قوسىلعان كەزدە، ارينە، قۋاندىق. سەبەبى ۇلىمىز باقىتتان باسى اينالىپ ءجۇردى. ول جاقسى كورەتىنى بايقالدى. ءبىراق ۋاقىت وتە كەلە ول قاتەلەسكەنىن بىلدىك. قازاقتا "جاقسى ايەل كۇيەۋىن تورگە سۇيرەيدى، جامان ايەل جاقسى ەركەكتىڭ باسىن كورگە سۇيرەيدى" دەگەن تۇسىنىك بار. ولار ءبىر-بىرىن جاقسى كورگەنىمەن ءبىر-بىرىن جاقسى تانىماي جاتىپ ۇيلەندى"، - دەيدى ءۋاليحان بيشىمبايەۆ.
