«Qazaqstan temir joly» ulttyq kompaniiasynyń qaryzy 3,9 trln teńgege jetip, birqatar nesielik kórsetkishter boiynsha belgilengen shekten asty, dep habarlaidy dalanews.kz.
Kompaniianyń qarjylyq esebine sáikes, QTJ-nyń HSBC bankinen alǵan nesieleri boiynsha boryshtyq júkteme koeffitsienti 1,18-ge jetken. Al kelisimshartta ruqsat etilgen eń joǵary deńgei – 1,15. Alaida HSBC bul kórsetkishtiń ýaqytsha artyp ketýin nesielik mindettemelerdi buzý retinde eseptemeýge kelisken. Banktiń bul sheshimi 2026 jylǵy 30 qarashaǵa deiin kúshinde bolady.
Jyl basynan beri QTJ-nyń nesieleri men shyǵarǵan obligatsiialarynyń jalpy kólemi 22%-ǵa ósip, 3,9 trln teńgeni quraǵan. Alty ai ishinde kompaniia 1,09 trln teńge kóleminde qosymsha qarjy tartqan.
Sonymen qatar qarjylandyrýǵa jumsalatyn shyǵyndar da aitarlyqtai artqan. Biylǵy alǵashqy jartyjyldyqta bul kórsetkish 38%-ǵa ósip, 164,9 mlrd teńgege jetti.
Esepti kezeńde kompaniianyń taza paidasy 191 mlrd teńgeni qurap, ótken jylmen salystyrǵanda 2,2 ese kóbeigen. Degenmen bul ósimniń edáýir bóligi teńge baǵamynyń ózgerýinen qalyptasqan. Biyl QTJ valiýta baǵamynyń aýytqýynan 99,7 mlrd teńge kóleminde tabys tapsa, ótken jyldyń osy kezeńinde 77 mlrd teńge shyǵynǵa ushyraǵan bolatyn.
Qarjylyq esepte kompaniianyń qysqa merzimdi mindettemeleri ainalymdaǵy aktivterinen 923,2 mlrd teńgege artyq ekeni kórsetilgen. Sondai-aq aldaǵy bir jyl ishinde QTJ 562 mlrd teńge kólemindegi qaryzyn óteýi tiis.
