Keshe Májiliste QTJ ulttyq kompaniiasyna qatysty másele kóterildi. Osy oraida Dalanews.kz Oljas Qudaibergenovtiń pikirin surady.
2022 jyly Oljas Qudaibergenov burynǵy premer-ministr, "Qazaqstan temir joly" Ulttyq kompaniiasy" AQ eks-basshysy Asqar Mamin men eks-prezident Nursultan Nazarbaevtyń keibir jaqyn adamdarynyń áreketterinen QTJ 2 trillion teńge qaryzǵa batqanyn aitty.
"Jaqynda Instant payments týraly jańalyqtar shyqty. QTJ Instant payments-pen kelisimshartty buzyp qana qoimai, olar oilap tapqan nárseniń bárin QTJ balansyna alý týraly kelisimge keldi, muny bári bile bermeidi. Oǵan qosa Maminniń komandasy men keibir otbasy músheleri salaǵa orasan zor ziian keltirdi. Solardyń saldarynan QTJ-da 2 trln. teńge qaryz bar. Qazir ótkenniń artyn tazalaityn kadrlyq ózgerister bolyp jatyr", - dedi ol buǵan deiin.
Keshe Májilis otyrysynda Joǵary aýditorlyq palatanyń tóraǵasy Álihan Smaiylov "Qazaqstan temir joly" AQ-nyń qaryzy shamamen 3 trillion teńgege jetkenin aitty. Ol QTJ-ǵa bankrot qaýpi tónip turǵanyn da ashyq málimdedi.
"Sońǵy 4 jylda temirjol salasyn damytýǵa shamamen 2 trln teńge bólingen, onyń ishinde biýdjet qarajaty esebinen 332 mlrd. teńge jumsalǵan. Bul ekonomikanyń júkter men jolaýshylardy tasymaldaý qajettiligin úzdiksiz jáne sapaly qamtamasyz etý úshin jetkiliksiz bolyp shyqty. Saldarynan temirjol jelileri, lokomotivter, vagondar ábden tozǵan. ...Búginde QTJ óz mindettemelerin tolyq tóleýge qabileti joq jáne kredit qaýpiniń "qyzyl" aimaǵynda tur. Onyń boryshy 2024 jyldyń basynda 2,9 trln teńge boldy, ol áli de ósip jatyr. Jalpy boryshtyń 45 paiyzy nemese 1,3 trln teńgesi buryn alynǵan boryshtyq mindettemelerdi qaita qarjylandyrýǵa baǵyttalǵan", - dedi ol.
Sarapshy Oljas Qudaibergenov QTJ-da másele bary ras ekenin, degenmen Smaiylov tóndirgendei qaýip joǵyn aitty.
"QTJ-da problema kóp, biraq bankrot bolýy múmkin emes. Qazir qaita QTJ-nyń jaǵdaiy jaqsaryp kele jatyr. 2023 jyly tabysy 30 paiyzǵa kóbeiip, al taza paidasy 4 ese ósti. QTJ jyl saiyn tólenetin qaryzyn tólep jatyr", - deidi ol.
Sonymen qatar, ekonomist bul máseleniń tamyry Maminniń kezinde qalyptasqanyn jetkizdi.
"Smaiylov premer bolǵan kezde QTJ týraly biraz syn aitty, maqtaǵany da bar. Árine, qazirgi problemalar kóbine Mamin kezinde týyndady. Biraq endi Joǵarǵa aýditorlyq palataǵa kelgen soń (Smaiylov - esk.) osyndai kritikany nelikten aitqany túsinikti. Smaiylovtyń tolyq esebin qórseńiz, ol jerde biraz jaqsy usynys bar. Kóbi - ózi premer bolǵan kezinde qoldaǵan usynystar. Tek eki oimen kelispeimin: bankrot bolatynyna, sosyn QTJ-ny syrtqy basqarýǵa berýge", - deidi Oljas Qudaibergenov.
