كەشە ماجىلىستە قتج ۇلتتىق كومپانياسىنا قاتىستى ماسەلە كوتەرىلدى. وسى ورايدا Dalanews.kz ولجاس قۇدايبەرگەنوۆتىڭ پىكىرىن سۇرادى.
2022 جىلى ولجاس قۇدايبەرگەنوۆ بۇرىنعى پرەمەر-مينيستر، "قازاقستان تەمىر جولى" ۇلتتىق كومپانياسى" اق ەكس-باسشىسى اسقار مامين مەن ەكس-پرەزيدەنت نۇرسۇلتان نازاربايەۆتىڭ كەيبىر جاقىن ادامدارىنىڭ ارەكەتتەرىنەن قتج 2 تريلليون تەڭگە قارىزعا باتقانىن ايتتى.
"جاقىندا Instant payments تۋرالى جاڭالىقتار شىقتى. قتج Instant payments-پەن كەلىسىمشارتتى بۇزىپ قانا قويماي، ولار ويلاپ تاپقان نارسەنىڭ ءبارىن قتج بالانسىنا الۋ تۋرالى كەلىسىمگە كەلدى، مۇنى ءبارى بىلە بەرمەيدى. وعان قوسا ءماميننىڭ كومانداسى مەن كەيبىر وتباسى مۇشەلەرى سالاعا وراسان زور زيان كەلتىردى. سولاردىڭ سالدارىنان قتج-دا 2 ترلن. تەڭگە قارىز بار. ءقازىر وتكەننىڭ ارتىن تازالايتىن كادرلىق وزگەرىستەر بولىپ جاتىر"، - دەدى ول بۇعان دەيىن.
كەشە ءماجىلىس وتىرىسىندا جوعارى اۋديتورلىق پالاتانىڭ ءتوراعاسى ءاليحان سمايىلوۆ "قازاقستان تەمىر جولى" اق-نىڭ قارىزى شامامەن 3 تريلليون تەڭگەگە جەتكەنىن ايتتى. ول قتج-عا بانكروت ءقاۋپى ءتونىپ تۇرعانىن دا اشىق مالىمدەدى.
"سوڭعى 4 جىلدا تەمىرجول سالاسىن دامىتۋعا شامامەن 2 ترلن تەڭگە بولىنگەن، ونىڭ ىشىندە بيۋدجەت قاراجاتى ەسەبىنەن 332 ملرد. تەڭگە جۇمسالعان. بۇل ەكونوميكانىڭ جۇكتەر مەن جولاۋشىلاردى تاسىمالداۋ قاجەتتىلىگىن ۇزدىكسىز جانە ساپالى قامتاماسىز ەتۋ ءۇشىن جەتكىلىكسىز بولىپ شىقتى. سالدارىنان تەمىرجول جەلىلەرى، لوكوموتيۆتەر، ۆاگوندار ابدەن توزعان. ...بۇگىندە قتج ءوز مىندەتتەمەلەرىن تولىق تولەۋگە قابىلەتى جوق جانە كرەديت ءقاۋپىنىڭ "قىزىل" ايماعىندا تۇر. ونىڭ بورىشى 2024 جىلدىڭ باسىندا 2،9 ترلن تەڭگە بولدى، ول ءالى دە ءوسىپ جاتىر. جالپى بورىشتىڭ 45 پايىزى نەمەسە 1،3 ترلن تەڭگەسى بۇرىن الىنعان بورىشتىق مىندەتتەمەلەردى قايتا قارجىلاندىرۋعا باعىتتالعان"، - دەدى ول.
ساراپشى ولجاس قۇدايبەرگەنوۆ قتج-دا ماسەلە بارى راس ەكەنىن، دەگەنمەن سمايىلوۆ توندىرگەندەي ءقاۋىپ جوعىن ايتتى.
"قتج-دا پروبلەما كوپ، ءبىراق بانكروت بولۋى مۇمكىن ەمەس. ءقازىر قايتا قتج-نىڭ جاعدايى جاقسارىپ كەلە جاتىر. 2023 جىلى تابىسى 30 پايىزعا كوبەيىپ، ال تازا پايداسى 4 ەسە ءوستى. قتج جىل سايىن تولەنەتىن قارىزىن تولەپ جاتىر"، - دەيدى ول.
سونىمەن قاتار، ەكونوميست بۇل ماسەلەنىڭ تامىرى ءماميننىڭ كەزىندە قالىپتاسقانىن جەتكىزدى.
"سمايىلوۆ پرەمەر بولعان كەزدە قتج تۋرالى ءبىراز سىن ايتتى، ماقتاعانى دا بار. ارينە، قازىرگى پروبلەمالار كوبىنە مامين كەزىندە تۋىندادى. ءبىراق ەندى جوعارعا اۋديتورلىق پالاتاعا كەلگەن سوڭ (سمايىلوۆ - ەسك.) وسىنداي كريتيكانى نەلىكتەن ايتقانى تۇسىنىكتى. سمايىلوۆتىڭ تولىق ەسەبىن قورسەڭىز، ول جەردە ءبىراز جاقسى ۇسىنىس بار. كوبى - ءوزى پرەمەر بولعان كەزىندە قولداعان ۇسىنىستار. تەك ەكى ويمەن كەلىسپەيمىن: بانكروت بولاتىنىنا، سوسىن قتج-نى سىرتقى باسقارۋعا بەرۋگە"، - دەيدى ولجاس قۇدايبەرگەنوۆ.
