Máskeýde «Qazaqstan temir joly» ulttyq kompanıasy» AQ basqarma tóraǵasy Talǵat Aldybergenov pen «Reseı temir joldary» AAQ bas dırektory – basqarma tóraǵasy Oleg Belozerovtyń jumys kezdesýi ótti, dep habarlaıdy Dalanews.kz.
Kezdesýde taraptar 2024 jyldyń qarashasynda Astanada qol qoıylǵan kelisimniń oryndalý barysyn talqylap, strategıalyq áriptestikti kúsheıtý baǵytyn qýattady.
Kelissóz nátıjesinde memleketaralyq túıispe beketterindegi jumysty jetildirýdi kózdeıtin hattamaǵa qol qoıyldy. Vagon aǵyndarynyń baǵyty ózgeredi, poıyzdardy qabyldaý jáne tapsyrý tehnologıasy avtomattandyrylady, vagondardy qyzmet kórsetý kepildik aralyǵy ulǵaıady.
Boljam boıynsha, jyldyń ekinshi jartysynda táýligine berilýi tıis poıyzdar sany 30%-ǵa artyp, 65 juptan 85 jupqa deıin jetpek. Sondaı-aq taraptar 2026–2027 jyldarǵa arnalǵan memleketaralyq túıispe beketterin damytý boıynsha sınhrondalǵan jospardy kelisti.
Kezdesý barysynda «Soltústik – Ońtústik» halyqaralyq kólik dáliziniń shyǵys baǵyty boıynsha tasymaldy keńeıtý, ASOÝP-2 jobasy aıasynda aqparattyq júıelerdi biriktirý, Qytaı – Eýropa baǵyty boıynsha tranzıttik tasymaldy avtomattandyrý, sondaı-aq tranzıttik deklarasıalardy avtomatty rejımde rásimdeý jáne olardy Reseı men Belarýs temir joldarynyń aqparattyq júıelerimen ıntegrasıalaý máseleleri kóterildi.
Taraptar 2026 jylǵa poıyzdardy qabyldaý/tapsyrý jáne tasymal kólemin ulǵaıtý máselesin Birlesken jumys tobynyń otyrysyna shyǵarýǵa ýaǵdalasty.
Qazaqstandyq tarap bıyl Dostyq–Moıynty baǵytynyń qurylysy, Almaty torabynyń aınalma temir joly jáne úsh myń shaqyrymnan astam qoldanystaǵy jelilerdi jańǵyrtý jumystary aıaqtalatynyn atap ótti. Bul QTJ-nyń ótkizý qabiletin aıtarlyqtaı arttyrady.
– Strategıalyq áriptestik týraly kelisimdi iske asyrý men memleketaralyq temirjol túıispelerindegi birlesken jumys aıasyndaǵy konstrýktıvti yntymaqtastyǵymyz tasymal kóleminiń turaqty ósýin qamtamasyz etip, poıyz almasýdy 2025 jyldyń alǵashqy jartyjyldyǵymen salystyrǵanda 30%-ǵa – 85 jupqa deıin ulǵaıtady dep senemin. Sonymen qatar biz iri ınfraqurylymdyq jobalardy, temirjol tasymalyn sıfrlandyrý men avtomattandyrý sharalaryn belsendi iske asyryp jatyrmyz. Atap aıtqanda, tranzıttik deklarasıalardy avtomatty rejımde rásimdeý – bul bizdiń kólik-aqparattyq júıelerimizdiń ashyqtyǵyn, damýyn jáne ıntegrasıasyn qamtamasyz etetin berik negiz, – dedi Talǵat Aldybergenov.
Aıta keteıik, júk tasymaly kólemi turaqty ósip keledi. 2025 jyldyń alǵashqy alty aıynda 45 mıllıon tonnadan astam júk tasymaldanǵan – bul ótken jyldyń sáıkes kezeńimen salystyrǵanda 4,1%-ǵa kóp. Konteınerlik tranzıt 273,3 myń DFE-ni qurap, 2024 jylmen salystyrǵanda 18%-ǵa ósti.
