Qostanai oblysynda internet-alaiaqtarǵa SIM-kartalardy belsendirýge kómektesken 26 jastaǵy áiel anyqtaldy, dep habarlaidy Dala News.
Politsiia málimetinshe, kúdikti tirkelgen nómirlerge WhatsApp messendjerinde akkaýnttar ashyp, keiin olarǵa qoljetimdilikti úshinshi tulǵalarǵa bergen. Dál osyndai nómirler arqyly alaiaqtar azamattarǵa habarlasyp, ózderin bank qyzmetkeri, quqyq qorǵaý organy nemese túrli uiymdardyń ókili retinde tanystyryp, adamdardy aldaǵan.
Tergeý barysynda áieldiń SIM-kartalardy belsendirý arqyly tabys tapqany anyqtaldy. Tólem kriptovaliýta arqyly júrgizilip, keiin qarajat banktik shottarǵa shyǵarylyp otyrǵan.
Tintý kezinde alty uialy telefon, úsh planshet jáne túrli bailanys operatorlaryna tiesili 400-ge jýyq SIM-karta tárkilendi.
Atalǵan derek boiynsha alaiaqtyq faktisimen qylmystyq is qozǵaldy. Qazir tergeý amaldary júrgizilip, oqiǵanyń barlyq mán-jaiy men yqtimal sybailastary anyqtalyp jatyr.
Kostanai oblystyq politsiia departamenti azamattarǵa messendjerler arqyly keletin kúmándi habarlamalar men qońyraýlarǵa senbeýge, jeke derekterin jariialamaýǵa jáne belgisiz adamdardyń ótinishi boiynsha qarjylyq operatsiialar jasamaýǵa keńes berdi.
