Premer-ministrdiń orynbasary Ermek Kósherbaev Qostanai oblysyna jumys sapary barysynda biznestiń áleýmettik bastamalarymen tanysyp, sonyń ishinde qazaqstandyq Allur avtomobil kompaniiasy salyp jatqan Allur Campus jobasyn kórip qaitty, dep habarlaidy Dalanews.kz.
Jalpy aýdany 13,5 myń sharshy metrden asatyn toǵyz qabatty kirpish ǵimaratta 300 adamǵa jaǵdai jasalǵan. Ishinde 71 otbasylyq bólme, 60 stýdenttik bólme jáne 20 qonaqqa arnalǵan ýaqytsha turý orny qarastyrylǵan. Barlyq turǵyn bloktar jeke as úimen, jýynatyn bólmemen jáne demalys oryndarymen jabdyqtalǵan. Buǵan qosa, kampýsta meditsinalyq pýnkt, kitaphana, kompiýterlik synyp, jattyǵý zaly men kir jýatyn bólmeler qyzmet kórsetedi.
Nysannyń qurylysy 2023 jyly bastalyp, biyl tamyz aiynda paidalanýǵa beriledi dep josparlanýda. Búginge deiin jobaǵa tartylǵan investitsiia kólemi 2,1 mlrd teńgeden asqan. Joba tolyǵymen Allur kompaniiasynyń óz qarjysyna júzege asyrylyp jatyr.
Allur Campus – óńirdegi áleýmettik infraqurylymnyń mańyzdy bóligi. Joba jastarǵa sapaly ómir súrýge, bilim alyp, kásibi turǵyda damýyna qolaily jaǵdai jasaýǵa baǵyttalǵan. Sondai-aq, bul keshen Qostanaidaǵy avtokomponentter men tehnika óndirisi shoǵyrlanǵan ónerkásiptik klasterdiń ajyramas bóligine ainalmaq. Osylaisha, jas mamandar úshin jumys ornymen qatar, ómir súrýge qolaily orta qalyptasady.
“Mundai jobalar indýstrialdy nysandardyń ainalasynda qalyptasatyn jańa ómir úlgisine jol ashatyn qýatty áleýmettik impýls. Prezident jariialaǵan Jumysshy mamandyqtar jylynyń aiasynda bul bastamalardyń mańyzy erekshe. Bilikti ári yntaly kadrlarsyz básekege qabiletti ekonomika qurý múmkin emes. Osy keshen siiaqty jobalar jas mamandardyń kásibi eńbek jolyn tańdaýyna yqpal etetin laiyqty, zamanaýi ári tartymdy orta qalyptastyrady”, – dep atap ótti vitse-premer Ermek Kósherbaev.
Jobanyń aýqymy aldaǵy ýaqytta keńeie túspek. Ekinshi kezeńde 260 oryndyq balabaqsha men fýtbol jáne basketbol alańdary, júgirý joldary, vorkaýt alańdary, ústel tennisine arnalǵan oryndar qamtylǵan sport keshenin salý josparlanyp otyr.
Osyndai iri áleýmettik bastamalar aimaqtardy damytýdyń jańa úlgisin kórsetedi. Bul iri biznestiń óndiristik qýattardy ǵana emes, sonymen birge qyzmetkerleri men bolashaq mamandardyń turmys sapasyn jaqsartýǵa investitsiia salatyndyǵynyń naqty kórinisi.
