Qostanaida Ýaqytsha beiimdeý jáne detoksikatsiia ortalyǵynyń qyzmetkeri jasy úlken er adamdy qatygezdikpen soqqyǵa jyqqan, dep habarlaidy Dalanews.kz.
Qart kisiniń soqqyǵa jyǵylǵan sáti túsirilgen videony onyń qyzy jariialady. Aitýynsha, 27 shilde kúni 61 jastaǵy ákesin atalǵan ortalyqqa jetkizgen. Sol jerde meditsina qyzmetkeri ony uryp-soqqan. Qyzynyń aitýynsha, ákesiniń kamerada temeki tutatqanyn sebep qylyp, oǵan qol kótergen. Saldarynan er adam aýyr jaraqat alyp, qabyrǵalary synǵan ári búiregine zaqym kelgen. Keiin dárigerler zaqymdanǵan búiregin alyp tastaýǵa májbúr bolǵan.
Qostanai oblystyq politsiia departamenti kúdiktiniń ustalyp, ýaqytsha ustaý izoliatoryna qamaýǵa alynǵanyn habarlady.
“Biylǵy jyldyń shilde aiynda qasaqana aýyr dene jaraqatyn keltirý deregi boiynsha qylmystyq is qozǵaldy. Qazirgi ýaqytta barlyq qajetti tergeý amaldary júrgizilýde”, – delingen politsiianyń resmi habarlamasynda.
Jaqyn kúnderi qylmystyq is materialdary sotqa joldanbaq.
Aita keteiik, biyl shilde aiynda Qostanai qalasynyń aýrýhanasynda naýqastardyń biri otadan shyqqan dárigerge shabýyl jasaǵan edi. Dáriger jansaqtaý bólimine tústi. Onyń bas súiegi synǵan, miy shaiqalyp, aýyr jaraqat alǵan. Keiin ol meditsinalyq aviatsiia arqyly Astanaǵa jetkizildi.
